Qyteti i Shkupit me vendim të ri në lidhje me transportuesit privat

F1 C 17:52, 06-12-2022

Bllokada e autobusëve privat në Shkup, foto: Suad Bajrami/Portalb.mk

Qyteti i Shkupit nesër do të shpallë thirrje publike për transportuesit privatë të autobusëve me linjat numër 20 dhe 22. Dallimi i vetëm, siç informojnë nga Qyteti i Shkupit, është se as “Slloboda prevoz”, as “Makekspres” nuk do të mund të konkurrojnë për një vit nga dita e prishjes së kontratës për shkak të shkeljes së dispozitave të kontratës nga ana e tyre, raporton MIA.

“Ftojmë të gjithë operatorët privatë të aplikojnë në thirrjen e publikuar, individualisht ose përmes një përfaqësuesi të një grupi transportusish privatë”, thuhet në njoftimin e Qytetit.

Prej aty thonë se transportin publik të qytetit e organizojnë organet e vetëqeverisjes lokale, e jo biznesmenë privatë, parti politike apo grupe të tjera interesi, dhe, siç thuhet në njoftim, në këtë rast organizimi i transportit publik të qytetit është përgjegjësi e Qytetit të Shkupit dhe NQP Shkup.

“Angazhimi kryesor i këtij menaxhmenti të qytetit është optimizimi i shpenzimeve joproduktive dhe riorientimi i atyre fondeve në projekte ku përfitojnë qytetarët. Kështu, Qyteti i Shkupit dhe NQP në gjashtë muajt e fundit kanë arritur të pajisin 130 autobusë nga flota e NQP-së, me çka numri i autobusëve të qytetit nga 140 aktivë në këtë periudhë të vitit të kaluar, është rritur në 270. Në këtë mënyrë, qytetarët e qytetit të Shkupit marrin shërbim më të mirë, më të lirë, të besueshëm dhe të standardizuar”, thonë nga Qyteti i Shkupit.

Ndryshe, rreth 200 autobusë janë vendosur edhe sot në udhëkryqin në Mavrovka dhe Kryqin e Kuq, si dhe në Bulevardin Ilindenska. Bllokadat do të mbeten në vendet ekzistuese derisa të ulen dhe të gjendet një zgjidhje sipas ligjit dhe vendimit të qytetit të Shkupit. Qyteti i Shkupit u zotua se sot do të dalin me pozicionin e tyre në një konferencë për shtyp.

Portalb.mk paraprakisht informoi se qytetarët e Shkupit e vazhdojnë ta paguajnë çmimin e mosmarrëveshjeve mes transportuesve privat dhe Qytetit të Shkupit, derisa Qeveria rri anash dhe shpallet jokompetente për t’ia marrë kompetencat Ndërmarrjes së Qarkullimit Publik për ta rregulluar çështjen e transportit publik, i cili është jetik për funksionimin e kryeqytetit.

Autobusi që duhet të vijë në 7-8 minuta vjen në 30 minuta. Grumbuj qytetarësh mund të vërehen në çdo stacion autobusi duke pritur për t’u ngjitur në autobusët, të cilët për shkak vonesave janë të stërmbushur me udhëtarë. Në atë gjendje, nxënës, punëtorë, të moshuar, të sëmurë detyrohen të shtypen njëri me tjetrin vetëm për të arritur në destinacionin përkatës, pasi që për autobusin e radhës duhet të presin kushedi sa. Por, ka raste kur për shkak të stërmbushjes, autobusët fare nuk ndalojnë në stacione.

Qyteti i Shkupit e shfuqizoi marrëveshjen me “Makekspres” e cila kishte vlefshmëri deri në fund të vitit 2023, pasi që sipas tyre, autobusët e linjave 19, 20, 22, 52 dh 54 nuk i kanë respektuar kushtet e përcaktuara për dhënien e shërbimeve cilësore. Nga NQP thanë se do t’i zëvendësojnë me autobusë dhe shoferë të tyre këto linja.

Disa ditë më vonë edhe kompania “Slloboda prevoz” hyri në grevë për shkak se deklaronin se NQP u ka borxh prej 1 milion euro. Për këtë kjo kompani ndaloi së qarkulluari linjat 9, 12, 22, 23 dhe 45.

Paraprakisht, Qyteti i Shkupit njoftoi se e ka shfuqizuar marrëveshjen edhe me “Slloboda Prevoz”, ashtu që të dy kompanitë ndaluan së qarkulluari në 10 linja me mbi 200 autobusë.

NQP Shkup tani është transportuesi i vetëm i këtyre linjave. Për shkak mungesës së autobusëve që mund të zëvendësohen, qytetarët ankohen për vonesa të autobusëve.

Portalb.mk, është ndër mediat e para që ka shkruar për problemin me transportuesit privat, i cili pastaj u shndërrua në problem kryesor të qytetit.

Prej vitit 2016-të, autobusët privat kanë qarkulluar në kuadër të NTP-së. Ata paguhen për kilometër të kaluar në qarkullim, varësisht prej lartësisë së çmimit të derivateve.