244 persona kanë marrë rrogë nga Komuna e Tetovës, por nuk kanë shkuar në punë, alarmojnë nga VMRO-DPMNE
Opozita ka alarmuar që 244 qytetarë kanë marrë rroga në Komunën e Tetovës por nuk kanë shkuar në punë, në periudhën kur kjo komunë është udhëhequr nga koalicioni BDI-LSDM, transmeton Portalb.mk.
“Koalicioni i krimit BDI-LSDM e kanë dëmtuar Komunën e Tetovës me 7 milionë. Aq është vlera për shkak se nuk kanë shkuar në punë 244 persona, të cilët merrnin rroga nga buxheti i komunës, edhe pse nuk kanë punuar asgjë”, deklarojnë nga VMRO-DPMNE.
Ata vlerësojnë se përgjegjësi duhet të kenë personat që nuk kanë shkuar në punë, por fillimisht Teuta Arifi.
“7 milionë në vend për përmirësimin e higjienës në qytet, instalime të reja për ujësjellësin dhe kanalizimin, kanë përfunduar te njerëzit e listës së Teuta Arifit, BDI-së dhe LSDM-së”, vlerësojnë nga opozita, duke theksuar që ky është shembulli si funksionon koalicioni BDI-LSDM.
Ndryshe, Komuna e Tetovës gjatë javës publikoi listën e personave të punësuar në komunë përmes kontratës në vepër shifra e të cilave ishte 812, por komuna për këtë nuk e bëri ndarjen se sa prej këtyre personave kanë qenë në punë dhe kanë dorëzuar raport dhe sa kanë marrë para nga taksat e qytetarëve tetovar. Kjo çështje u bë mollë sherri në mes ministrit të Ekonomisë, Kreshnik Bekteshit dhe Komunës së Tetovës, të cilët hodhën akuza ndaj njëri tjetrit.
- LEXO: Kontratat në vepër, përplasje midis Bekteshit dhe Komunës së Tetovës (Video)
- LEXO: Komuna e Tetovës ende nuk ka informacion sa i kushtuan buxhetit të komunës 812 kontratat në vepër
- LEXO: Kjo është lista e kontratave në vepër në Komunën e Tetovës për vitin 2021 (Dokument)
- LEXO: Kasami: Të ndërpriten të gjitha 350 kontratat në vepër, kërkoi raport për të vijuar pastaj me sistemimin e tyre (Video)