Maqedonia e Veriut në muajin e ardhshëm vendoset në selinë e NATO-s

F1 C 17:27, 13-02-2020

Ministrja e Mbrojtjes e Maqedonisë së Veriut, Radmilla Shekerinska/ Foto: Husamedin Gina - Anadolu Agency

Radmilla Shekerinska, ministrja për mbrojtje gjatë qëndrimin në Bruksel në takimet e Këshillit veriatlantik theksoi se në gjysmën e dytë të muajit mars do të përfundojnë punimet për anëtarësimin e plotë të vendit në NATO, transmeton Portalb.mk.

“Misioni ynë, si pjesa politike, ashtu edhe mbrojtja, do të jenë pjesë e selisë së NATO-s, ashtu si RMV-ja, do të jemi edhe zyrtarisht pjesë e Aleancës”, tha Shekerinska.

Ajo rrugëtimin e RMV-së drejt NATO-s e llogariti si një shembull suksesi, duke vlerësuar se bashkëpunimi tashmë nuk mund të vlerësohet vetëm partneritet, por edhe aleancë.

Shekerinska arriti të falënderon homologët grek, slloven, malazez, kroat, boshnjak dhe bullgar për mbështetjen në rrugëtimin drejt NATO-s.

Ndryshe, Kuvendi i Maqedonisë së Veriut, me 114 vota ‘për’ e ratifikuan Protokollin për anëtarësimin e RMV-së në NATO.

Procesi i ratifikimit të Protokollit nga shtetet anëtare erdhi pasi që ai fillimisht është nënshkruar më 6 shkurt në Bruksel, pas zgjidhjes së kontestit me Greqinë për ndryshimin e emrit dhe nënshkrimin e Marrëveshjes së Prespës. Pasi të gjitha vendet anëtare të NATO-s ta ratifikojnë Protokollin në Kuvendet e tyre, Maqedonia e Veriut do të bëhet anëtarja e 30 e NATO-s.

Ky Protokoll është ratifikuar nga 28-të shtetet anëtarë të NATO-s, derisa e fundit pritet ta nënshkruan Spanja, e cila një kohë të gjatë ishte pa qeveri. Anëtarësimi do të jetë i plotë, vetëm atëherë kur Spanja do të ratifikon këtë Protokoll.