Shkëndija kërkon ti kthejë borxhin Sileksit

Sot në ora 16:00, do të zhvillohen ndeshjet e javës  së 25-të në Ligën e Parë të futbollit të Maqedonisë, Shkëndija luan për herë të fundit si nikoqire jashtë Tetovës, ndërsa Shkupit në cilësinë e mysafirit udhëton drejt Turnovës. Renova këtë javë është nikoqire e Mlladost CD.

“Mendoj se do të jetë një ndeshje interesante, ku synojmë të marrim tre pikëshin për të ruajtur gjendjen të cilën po e kalojmë për momentin nga java në javë. E dimë se pikërisht kundër Sileksit kemi humbur tre pikë në ndeshjen e fundit dhe mendoj se Sileksi na ka borxh për të kthyer atë tre pikësh me një kosto më të lartë. Jemi të vetëdijshëm se do të jetë një ndeshje e fortë, normal Sileksi me pozitën që ka në tabelë është i treti dhe meriton respekt”, deklaroi Artim Pollozhani.

Edhe nga Shkupi që në ndeshjen e  fundit pësoi disfatë minimale dhe të pafat nga Vardari për ndeshjen në fjalë ka folur mesfushori Fiznik Zuka i cili shpreson që skuadra të marrë rezultat pozitiv dhe të afrohet sa më shpejt deri te pikët që do të vulosin kualifikimin në mesin e gjashtë ekipeve më të mira për të siguruar “play-off”-in.

“Sigurisht se udhëtojmë për në Turnovë për të rikthyer serinë pozitive. Nuk dëshirojmë të mendojmë për atë se çka ndodhi në ndeshjen e fundit, pasi që kemi punë për të vulosur sigurimin e pjesëmarrjes tonë në “play-off”. Kishim pak kohë për tu rikuperuar pas ndeshjes me vardarin, por besojmë se është e mjaftueshme për ne si futbollistë profesionist. Kjo është një javë e ngjeshur pasi luajmë tri ndeshje në brenda shtatë ditëve, andaj do të mundohemi të nxjerrim më të mirën në duelet e fundit që na presin”, ka thënë Fisnik Zuka.

Dyshet e javës së 25-të: Horizont T – Shkupi, Shkëndija – Sileksi, Renova – Mlladosti, Bregallnica – Metalurgu fillojnë në orën 16:00, ndërsa në ora 18:00 luajnë Vardari – Rabotniçki. /Portalb /