Kaos në Portin e Durrësit, mbi 100 kamionë e autobusë bllokohen në skaner
Mbi 100 kamionë e autobusë mbetën të bllokuar mbrëmjen e së premtes në doganë në pikë-kalimin e Portit të Durrësit, raporton EN. Ndonëse në pritje që prej orës 14:00, shoferët e humbën tragetin e orës 19:00 të linjës Durrës-Ankona.
“Rri nga ora 14:15 e deri tani në rradhë atje. Ne kemi humbur tragetin sot, të gjithë e kanë humbur”, u shprehën disa prej shoferëve.
Sipas tyre, shkak është bërë kalimi pa radhë dhe procedurat e tejzgjatura.
“Nëse trageti ka një orar, në orën 5 niset, këta duhet të ndërpresin çdolloj skanimi që të mbarojë punë trageti, kurse këtu futen pa rradhë”, tha një shofer.
Ky është vetëm fillimi i problemeve për ta. Në skanerin në dalje të portit më të madh në vend kalon çdo lloj mjeti që imbarkohet në tragete, duke nisur nga automjetet e vogla, e deri tek trajlerat.
Kjo shpesh shkakton vonesa në skaner, që më pas sjellin si rezultat nisjen me disa orë vonesë të trageteve, ose siç u pa, edhe humbjen e lundrimit.