BBC ka pranuar të ketë bërë lajm të rremë, kërkon falje
Transmetuesi publik britanik BBC ka kërkuar falje nga presidenti i Ukrainës Petro Poroshenko për shkak të një lajmi të rremë në lidhje me të dhe ka pranuar të paguajë dëmshpërblimin, transmeton Anadolu Agency (AA).
Sipas një deklarate të BBC-së, transmetuesi britanik në maj të vitit të kaluar kishte raportuar dhënien e një shume prej 400 mijë dollarësh për zgjatjen e një takimi të qershorit të vitit 2017 midis Poroshenkos dhe presidentit amerikan Donald Trump.
Në lajmin e fshirë nga faqja e internetit, BBC kishte pretenduar se pagesa i është bërë ish-avokatit të Trumpit, Michael Cohen.
“Pohimi në lidhje me takimin e qershorit të vitit 2017 nuk ishte i saktë”, tha BBC, duke rikujtuar se lajmi i rremë ishte publikuar edhe në një buletin informativ në Britani.
“Kërkojmë falje nga z. Poroshenko për çdo shqetësim të shkaktuar dhe kemi rënë dakord t’i paguajmë dëmet dhe shpenzimet e gjykatës”, tha transmetuesi publik i Britanisë.
