Në 8 muajt e parë të këtij viti Maqedoninë e kanë vizituar 617 mijë turistë

Enti Shtetëror për Statistikat (ESHS) njoftoi se gjatë muajit gusht në Maqedoni janë regjistruar 156.763 turistë të cilët kanë realizuar 694.641 bujtje, raporton Anadolu Agency (AA).

Sipas ESHS-së, numri i turistëve gjatë muajit gusht të këtij viti është ulur për 7.2 për qind krahasuar me të njëjtin muaj të vitit të kaluar, ndërsa numri i bujtjeve është ulur me 3.9 për qind.

Përveç kësaj, numri i turistëve vendas është ulur për 4.5 për qind, ndërsa e atyre të huaj për 10.9 për qind.

Turistët vendas kanë realizuar 0.7 për qind më pak bujtje, ndërsa ata të huaj 13.8 për qind, thuhet në njoftimin e ESHS-së.

Në njoftim thuhet gjithashtu se në tetë muajt e parë të këtij viti, në Maqedoni janë regjistruar 617.150 turistë, që paraqet rritje në krahasim me vitin e kaluar për 4.1 për qind.

Numri i përgjithshëm i bujtjeve të realizuara në këtë periudhë është 1.929.279 ose 1.8 për qind më shumë se periudha e njëjtë e vitit të kaluar.