De Biasi u telefonon kosovarëve, njëri i kërkon të largohet për të luajtur për Kosovën

Anëtarësimi i Kosovës në FIFA dhe në UEFA dhe pjesëmarrja në eliminatoret e Botërorit “Rusi 2018” hapi një tjetër mundësi reale për futbollistët kosovarë të Kombëtares shqiptare

Për të shmangur ndonjë surprizë të pakëndshme në ditët e ardhshme dhe për të mësuar nëse do të ketë largime të tilla ka menduar Gianni de Biasi

Burime për “Panorama Sport” bëjnë me dije se trajneri i Kombëtares shqiptare ka komunikuar me të gjithë futbollistët kosovarë të Shqipërisë dhe i ka pyetur çfarë do të vendosin mbi të ardhmen e tyre.

Italiani kërkon të jetë sa më i qartë për projektin që do të nisë me Shqipërinë në kuadër të eliminatoreve të Botërorit. Ai kërkon të mësojë nga futbollistët nëse kanë ndonjë plan për t’u larguar drejt Kosovës, apo do të vazhdojnë të jenë ende pjesë e këtij grupi që arriti të bënte historinë duke u kualifikuar për herë të parë në Evropian.

Megjithatë, për të qenë sa më korrekt dhe profesionist edhe në këtë pikë, tekniku italian u ka lënë një afat kohor për t’u menduar dhe për t’i kthyer përgjigje përfundimtare lidhur me këtë çështje.

Gjatë kësaj kohe ka pasur shumë lajme se disa futbollistë të lindur në Kosovë, por që luajnë për Shqipërinë, mund të zgjedhin të luajnë me përfaqësuesen më të re të Evropës. /Express