Jahjaga: Kosova qëndron me Brukselin
Presidentja e vendit, Atifete Jahjaga është shprehur e tronditur nga sulmet që ndodhën sot në Bruksel.
“E tronditur nga sulmet e sotme barbare në zemër të Evropës, në Bruksel, që lanë shumë të vdekur e të lënduar. Me zemër dhe mendje jemi me banorët e Brukselit, me familjet e viktimave dhe të gjithë atyre që sot u vunë në shënjestër të grupeve terroriste që duan të mbjellin frikë gjithandej Evropës duke sulmuar vlerat dhe virtytet e shoqërisë dhe demokracisë evropiane.”
“Në këto momente të dhembjes shprehim solidarizimin me popullin belg dhe ritheksojmë përkushtimin e Republikës së Kosovës në luftën globale kundër terrorizmit”.
“Kosova qëndron me Brukselin” ka shkruar e para e shtetit në një postim në llogarinë e saj në Facebook, transmeton Klan Kosova.
