Çair,pritet të miratohet vendimi për fazën e dytë të sheshit “Skënderbeu”
Nesër pritet të miratohet vendimi për fillimin e fazës së dytë të projektit sheshi “Skënderbeu”, nga Këshilli i Komunës së Çairit. Një pjesë e këtij projekti i takon Komunës Qendër, e cila ka miratuar gjatë javës së kaluar vendimin për fazën e dytë, ndërsa tani pritet të rrumbullakoset edhe pjesa tjetër që kërkon miratimin nga këshilli komunal i Çairit.
Faza e dytë për ndërtimin e sheshit “Skënderbeu”, parasheh mbulimin e bulevardit “Goce Dellcev”, për këtë arsye plotësimi i kompletuar i dokumentacionit do të kërkojë edhe miratimi e vendimit nga qyteti i Shkupit.
Duke parë rëndësinë e këtij projekti, autoritetet komunale thonë se e gjithë kjo do të bëhet pa ndonjë problem, në seancën e nesërme të Këshillit.
Përgjegjësi i sektorit juridik, pranë Komunës së Çairit, Rami Qerimi thotë se, pasi të bëhet miratimi i fazës së dytë, pritet të merret leja nga Qyteti i Shkupit, sepse, sipas ndryshimeve të ligjit, kompetencat mbi bulevardet, bien në qytetin e Shkupit. Rami Qerimi, thotë se jemi shumë afër me dokumentacionin dhe më në fund do të presim pëlqimin nga Ministria për Transport dhe Lidhje.
“Varësisht nga ecuria e këtyre proceseve, pritet që të fillojnë punët ndërtimore për fazën e dytë të sheshit “Skënderbeu”, që në variantin më të mundshëm duhet të fillojnë në pranverë”, thotë Rami Qerimi.
Sipas tij, mjetet financiare për sheshin Skënderbeu, do të jenë pjesë e buxhetit për vitin e ardhshëm. Shuma prej 2 – 3 milion euro, duhet ët rrumbullakos fazën e dytë të punimeve në sheshin Skënderbeu.
Edhe pse faza e parë e punëve ndërtimore për sheshin “Skënderbeu”, filloi me vonesë, autoritete komunale të Çairit, thonë se faza e dytë do të fillojë të realizohet menjëherë pas miratimit të vendimit nga qyteti i Shkupit dhe dhënies së pëlqimit nga Ministria e Transportit dhe Lidhjeve.