Celta nuk e njeh Barçen (Video)

Celta Vigo është kryesuesja e re e La Ligas. Skuadra nga Balaidos bëri surprizën e madhe, jo vetëm me vendin e parë në renditjen e Primeras por dhe me fitoren 4-1 ndaj Barcelonës, të cilën e luajti duke bërë pikërisht atë që përgjithësisht bën Barcelona, duke dhuruar spektakël pavarësisht se përballë kishte një skuadër, që në fushë kishte hedhur një treshe si Neymar-Messi-Suarez. Megjithatë tridhëmbëshi i vërtetë rezultoi ai i formuar nga Aspas, Nolito dhe Guidetti. Ndeshja e Barcelonës, mori tatëpjetën pikërisht pas një perle të Nolitos, që në të 26-tën realizoi parabolën perfekte me një goditje që nxori jashtë loje dhe një shtatëlartë si Ter Stegen.

Një tjetër parabël në të 30-tën, por këtë herë e Aspasit, e shndërroi ndeshjen e Barcelonës në një malore të pakapërcyeshme, pasojë dhe e futbollit dehës të formacionit të Berizos, që në fillimin e pjesës së dytë i vuri vulën 3 pikëve dhe me golin e dytë të Aspasit.

Sikur të mos mjaftonin goditjet ballore në fushë, katalanasit e morën një goditje pas shpine dhe në të 75-tën, me Gomezin që i lëshoi një grusht në kurriz Suarezit, të cilin uruguajani vështirë se do ta harrojë. Një shpresë të vakët, blaugranave ja ndezi Neymar me golin e 3-1, por një kundërsulm fantastik i Celtës, coi drejt golit të 4-1 Guidetin.

4-1 ishte rezultati përfundimtar, por jo për Barcën, por për Celtën, që për një mbrëmje bën Barcën në fushë dhe Barcën dhe në renditje, kur kryeson tashmë Primera Divizion të Spanjës.