Gostivar, pronarët mbrojnë objektet, komuna thotë se janë uzurpues
Realizimi i planit detal urbanistik te blloku “Urban 17” në Gostivar, kërkon sakrifikim e katër objekteve që sipas autoriteteve komunale janë të ndërtuara pa leje. Realizimi i kësaj arterie të rëndësishme për qytetin e Gostivarit ka përkrahjen e shumicës së këshilltarëve komunal.
Pronarët e këtyre objekteve janë munduar që të mbrojnë objektet e tyre nga rënimi duke dalë si mburojë e gjallë .
Sipas zëdhënësit të komunës së Gostivarit, Kasam Selimi, bëhet realizimi i planit detal te Blloku Urban 17 dhe se pari largohen katër objektet që janë ndërtuar në trasen e rrugës të që më pastaj të nxirret leje ndërtimi për rrugën.
“Deri në pranimin teknik te rrugës do të zgjidhet çështja e kompensimit-eksproprijimit, konform dispozitave ligjore të Ligjit për ndërtim dhe eksproprijim, për tokën që është e Republikës së Maqedonisë me të drejtë shfrytëzimi nga pronarët që kanë ndërtuar pa leje ndërtimi – objekte banimi”, thotë Kasam Selimi, për Portalb.
Komuna e Gostivarit posedon të gjithë dokumentacionin për zhvillimin e procedurës nga Drejtoria për çështje pronësore juridike për marrjen e të drejtës së shfrytëzimit, eksproprijimit dhe ankesave të parashtruara në kohën kur është bërë procedura.
Nga komuna thonë se inspektori i autorizuar pasi që bëri inspektimin në vendngjarje më 08.05.2014 përpiloi Procesverbal dhe më 09.05.2014 solli aktvendim për mënjanimin e objekteve dhe më 04.06.2014 solli konkluzion që palët vetë t’i mënjanojnë objektet. Nga komuna thonë se meqenëse vetë nuk i mënjanuan objektet, realizimin do ta kryejë komuna në përputhje me përgjegjësitë të cilat ia jep Ligji për ndërtim.
“Realizimi për mënjanimin e objekteve prolongua një muaj e gjysmë, për të fituar në kohë për të mënjanuar sendet me vlerë”, thotë Kasam Selimi.
Megjithatë banorët, prej disa muajve jetojnë në ankth për shkak se kanë marrë vendimet për rrënimin e shtëpive. Familjet kërkojnë që të dëmshpërblehen sipas çmimit të tregut për gjithë pronën e tyre.