Mariçiq: Vendimi i Gjykatës në Strasburg është shans që gjykatat e vendit të kithejnë besimin e qytetarëve në drejtësi

Zëvendëskryeministri përgjegjës për çështje evropiane, Bojan Mariçiq, në emisionin “Win-Win” në TV Telma, tha se vendimi i Gjykatës Evropiane për të Drejtat e Njeriut u drejtohet gjykatave të Maqedonisë dhe theksohet se Gjykatat dhe institucionet duhet të shprehen për të gjitha aspektet, përpara se të shkohet në një vendim meritor në Strasburg, që sipas tij është një shans i ri për gjykatat për të rritur besimin e ulët që kanë tek qytetarët, transmeton Portalb.mk.

“Rasti me abolimin e Ivanovit është kompleks, prandaj gjykatat tona dhe Gjykata në Strasburg ishin të kujdesshme. Ne nuk mund t’i shpëtojmë përgjegjësisë për zgjidhjen e problemeve tona dhe ky është mesazhi kryesor i zgjidhjes. Është me vend që të gjitha rastet e korrupsionit të lartë të marrin një zgjidhje institucionale, në mënyrë që opinioni të fitojë besimin në sistemin e drejtësisë”, tha zëvendëskryeministri dhe ish-ministri i Drejtësisë, Bojan Mariçiq.

Sipas Mariçiqit, beteja kyçe e fituar me vendimin e Gjykatës është që rastet nga PSP janë të vlefshme dhe vazhdojnë para gjykatave dhe kjo, siç thotë ai, ka qenë beteja kryesore dhe kyçe e shtetit në luftën për sundimin e ligjit dhe shtetit të së drejtës.

“Beteja kyçe që u fitua sot është se rastet nga ish-PSP-së, të cilat komentohen edhe nga Komisioni Evropian në raportet e tyre, mbeten të vlefshme dhe vazhdojnë të jenë objekt i gjykatave dhe prokurorive në vend”, tha Mariçiq.

Mariçiq, i cili si ministër i Drejtësisë ishte përgjegjës për përgatitjen e mbrojtjes së shtetit para Gjykatës së Strasburgut, tha se që nga dita e parë kur u bë ankesa në Strasburg, në vend filloi një fushatë se çështja ishte një punë e përfunduar dhe se Gjykata e Strasburgut vërtetoi abolimin e Ivanovit.

“Ishte një përcaktim strategjik i ekipit ligjor për të krijuar një imazh se kjo është një punë e kryer, si një mesazh për gjykatat dhe prokurorët në vend. Ndoshta për shkak të kësaj, çështjet kanë ecur ngadalë, duke pritur vendimin nga Strasburgu, se ajo gjykatë do të përfundojë punën e gjykatave tona”, shpjegoi Mariçiq.

Lidhur me zhvillimet në Kuvend dhe rikonstruimin aktual të Qeverisë, zëvendëskryeministri Mariçiq tha se opozita shfrytëzon çdo mundësi për të zbrazur Kuvendin nga përmbajtja dhe thelbi dhe se e përsërisin të njëjtin fjalim gjatë gjithë kohës për të fituar kohë.

Zëvendëskryeministri tha se qëllimi i rindërtimit është stabilizimi i qeverisë dhe forcimi i shumicës, e cila duhet të përfundojë skriningun, të krijojë hapësirë ​​për fazën e mëtejshme të negociatave dhe të krijojë kushte për një shumicë prej dy të tretash për ndryshimet kushtetuese.

Kërkesën e parë në Strasburg e ka dërguar në fillim të nëntorit 2017, ish-kryetari i Manastirit, Vladimir Taleski, përmes avokatit Vlatko Ilievski, bashkëshorti i ish-ministres së Punëve të Brendshme, Gordana Jankulloska. Mirëpo, deri në fund të vitit 2018 janë dorëzuar tetë të tjera.

Në mesin e emrave që fillimisht i fali dhe pastaj ua hoqi faljen janë, ish-kryetari i VMRO-DPMNE-së dhe ish kryeministri i Maqedonisë, Nikolla Gruevski, ish drejtori i DSK-së, Sasho Mijallkov, ish ministrja e Punëve të Brendshme, Gordana Jankulloska, ish ministri i Transportit dhe Lidhjes, Mile Janakieski, Martin Protugjer, lideri i LSDM-së, Zoran Zaev, Zoran Verushevski, Branko Crvenkovski, ish shefi i sigurimit të Gruevskit, Dejan Mitrovski-Urko, ish shefi i Drejtorisë së Pestë në DSK, Goran Grujoski,  lideri i PDSH-së, Menduh Thaçi, anëtari i KSHZ-së nga radhët e PDSH Bedredin Ibraimi.

Më së shumti ka falje ka pasur për Janakieskin dhe Jankullovskën. Ata janë në krye të listët me gjithsej 27 falje, për Nikolla Gruevskin dhe Martin Protugjerin nga 5 falje, ndërkaq për Zoran Zaevin dhe Zoran Verushevskin nga 2 falje.

Vendim për falje ka edhe për guvernatorin e kompanisë “Dajners klub Maqedoni” dhe bashkëshortin e Radmilla Sheqerinskës, Bozhidar Jankovski.

Edhe prokuroret speciale Fatime Fetai, Lile Stefanova dhe Gavrill Bubevski janë gjendur në mesin e të falurve nga Gjorge Ivanov. Kujtojmë se prokurorët special ishin të ndjekur për dyshime se kishin ushtruar presion ndaj dëshmitarëve.

• LEXO: Aksion gueril pas vendimit të djeshëm të Gjykatës së Strazburgut: “Do të vuani dënimin”
• LEXO: RMV, Gjykata e Strasburgut vendosi që rastet e PSP-së të mos pezullohen dhe procedurat për to të vazhdojnë
• LEXO: Abolimi nga presidenti Ivanov ende shihet si “shpëtim” nga të akuzuarit
• LEXO: Publikohen emrat në Gazetën Zyrtare, ja cilët persona i fali Ivanov
• LEXO: Ivanov i falë të gjithë politikanët dhe bashkëpunëtorët e tyre që janë nën hetime
• LEXO: Ivanov i shfuqizoi të gjitha vendimet për falje