Shoqata Lesja Ukrainka protestoi në Shkup pas bombardimeve ruse të qyteteve të Ukrainës (FOTO)
Shoqata e ukrainasve në Maqedoninë e Veriut sonte ka protestuar para Ambasadës së Rusisë në Shkup për të kundërshtuar sulmet ruse me raketa në disa qytete të Ukrainës, transmeton REL.
Drejtuesit e shoqatës që tubon kryesisht shtetas ukrainas të ikur nga Ukraina për shkak të agresionit të Rusisë, thanë se sulmet e ditës së hënë kanë për qëllim frikësimin e popullit të Ukrainës, por, kjo sipas tyre nuk do t’i zmbrapsë nga lufta kundër agresionit rus.
“Me granatimet e ditës së hënë, (presidenti rus, Vladimir) Putini dëshiron të na frikësojë duke bombarduar kapacitetet energjetike për të na lënë në errësirë, pa ngrohje dhe energji elektrike. Por ne nuk dorëzohemi, nuk frikësohemi. Do të qëndrojmë dhe do t’ia dalim. Ata janë terroristë”, ka thënë Oleksandar Urbanoviq, kryetar i Shoqatës së ukrainasve në Maqedoninë e Veriut.
Maqedonia e Veriut ka dënuar sulmet ruse të 10 tetorit ndaj objektivave civile në disa qytete të Ukrainës, përfshirë kryeqytetin, Kievin.
Pas sulmeve shkatërruese të sotme, ambasadorja e Ukrainës në Maqedoninë e Veriut, Larisa Dir ka reaguar me postimin e saj në Twitter.
Ajo postoi një video që tregon sulmet brutale, duke përfunduar me një mesazh ku shkruhej: “Jepini Ukrainës armë më të fuqishme”.
Sot, siç raportoi Reuters, Rusia gjuajti me raketa në qytete në të gjithë Ukrainën gjatë mëngjesit, duke vrarë civilë dhe duke ndërprerë furnizimin me energji elektrike dhe ngrohje.Presidenti rus Vladimir Putin i deklaroi këto sulme si hakmarrje për sulmet e Ukrainës, duke përfshirë edhe urën drejt Krimesë.
Raketat goditën kryqëzimet, parqet dhe pikat turistike në qendër të Kievit me një intensitet të paparë që kur forcat ruse u përpoqën të kapnin kryeqytetin në fillim të luftës.
Shpërthime u raportuan gjithashtu në Lviv, Ternopil dhe Zhytomyr në Ukrainën perëndimore, Dnipro dhe Kremençuk në Ukrainën qendrore, Zaporizhzhia në jug dhe Kharkiv në lindje. Autoritetet ukrainase thanë se të paktën 10 persona u vranë, shumë u plagosën dhe disa pjesë të vendit mbetën pa energji elektrike.
Në një fjalim televiziv, Putin tha se kishte urdhëruar sulme “masive” me rreze të gjata kundër objektivave të energjisë, komandës dhe komunikimit ukrainas, duke përdorur raketa të lëshuara nga ajri, deti dhe toka, në përgjigje të atyre që ai tha se ishin sulme terroriste, përfshirë shpërthimin e të shtunës në Urën e Krimesë.
Presidenti ukrainas Volodymyr Zelensky tha në një deklaratë në platformën Telegram se është i bindur se pas sulmit masiv me raketa të Rusisë në qytetet ukrainase, e gjithë bota ka parë edhe një herë fytyrën e vërtetë të shtetit terrorist që mbulon thelbin e tij kriminal me bisedimet e paqes.
“Sot e gjithë bota pa edhe një herë fytyrën e vërtetë të shtetit terrorist që po vret popullin tonë. Jo vetëm në fushën e betejës, por edhe në qytete paqësore. Një vend që mbulon vetëm thelbin e tij të vërtetë gjakatar dhe kriminal”, tha Zelenski.
Lufta në Ukrainë ka nisur më 24 shkurt. Vetë Putin e quan luftën si “operacion special ushtarak” për të çmilitarizuar Ukrainën. Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra. Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre.
