Filipçe: nuk mund të jetojmë më të mbyllur, epidemia do të zgjasë dhe shpëtimi është te vaksinat
Ministri i Shëndetësisë Venko Filipçe beson se tani që shteti ka siguruar vaksina të mjaftueshme në dispozicion për këdo që dëshiron të mbrohet nga Kovid-19, nuk duhet të ketë më mbyllje për të gjithë, orë policore dhe të ngjashme, por qytetarët duhet të marrin përgjegjësinë për shëndetin e tyre dhe të afërmve të tyre, transmeton Portalb.mk.
Në vend mbeten vetëm masat themelore për të parandaluar përhapjen e infeksionit si maska në ambiente të mbyllura , ose ku ka shumë njerëz në një hapësirë të vogël, distancë sociale dhe larje e shpeshtë e duarve. “Epidemia mund të zgjasë për shumë vite, kishte disa parashikime që mund të zgjasë deri në vitin 2024, që të mund të kalojë në formë endemike, por kjo nuk do të thotë që ne duhet të jetojmë të mbyllur”, tha ministri Filipçe.
Prandaj, Filipçe u bëri thirrje të gjithëve që të vaksinohen kundër Kovid-19, sepse vaksina mbron nga sëmundjet e rënda dhe vdekja.
Filipçe thotë se ne nuk mund ta dimë në të ardhmen se cilat lloje të reja mund të shndërrohen nga virusi që do të shkaktojë valë të reja infeksioni dhe si shembull përmendi Mbretërinë e Bashkuar ku qeveria nga 19 korriku do të heqë pothuajse të gjitha masat, pavarësisht nga fakti se atje tashmë ekziston një valë e re e shkaktuar nga varianti Delta i Kovid-19.
Deri më tani, dhjetë raste të llojit Delta të Koronavirusit janë regjistruar në RMV.
Kryeministri Britanik Boris Xhonson tha se numri i rasteve të reja të Koronavirusit në Mbretërinë e Bashkuar pritet të rritet në 50,000 në dy javë, por përsëri e përshkroi planin e qeverisë për të hapur plotësisht vendin në 19 korrik.
“Numri i njerëzve të infektuar po rritet me shpejtësi. Qeveria duhet të vendosë nëse është e sigurt të hapet tani. Nëse nuk hapemi tani që kemi arritur kaq shumë me vaksinimin, atëherë nuk e di se kur. Ne duam një situatë në të cilën njerëzit do të mbështeten në përgjegjësinë e tyre. Ne duhet të jemi të kujdesshëm dhe unë kërkoj nga njerëzit që të sillen të tillë”, tha Xhonson.
Gjithashtu edhe qeveria greke këmbëngul se njerëzit e vaksinuar do të kenë më shumë privilegje sapo vendi të kthehet në normalitet dhe se nuk do të ketë ri-mbyllje në ekonomi dhe jetën shoqërore vetëm për të mbrojtur ata që nuk pranojnë të vaksinohen kundër Kovid- 19. Zëvendëskryeministri grek Akis Skercos tha: “Mesazhi i qeverisë është i qartë: të vaksinuarit mund të kthehen në jetën normale dhe të pavaksinuarit jo”.
Ndërkohë qeveria kroate ka njoftuar se do të shfuqizojë ndihmën financiare për ato kompani, punonjësit e të cilave nuk duan të vaksinohen kundër Kovid-19. “Qëllimi është të shpërblejmë ata që janë përgjegjës dhe t’ju tregojmë të papërgjegjshmëve se ajo që po bëjnë nuk ka kuptim” tha ministri i Ekonomisë dhe Zhvillimit të Qëndrueshëm Tomislav Zoriç.
Ministri i Jashtëm gjerman Hajko Mas njoftoi se të gjitha masat Kovid-19 në Gjermani duhet të hiqen në gusht pasi vaksina t’u ofrohet të gjithëve.
Filipçe këmbëngul që tani kur vaksina u ofrohet të gjithëve, në vendin tonë nuk mund të jetojmë më të izoluar.
“Me vaksinat, qytetarët do të mbrojnë veten e tyre, edhe nëse virusi është i pranishëm dhe vjen një mutacion i ri, nëse infektohen ata do të kenë një formë të lehtë të sëmundjes, ndoshta një formë e ftohjes”, theksoi ministri.
Akademiku Aleksandar Dimovski nga Qendra për Inxhinierinë Gjenetike dhe Bioteknologji “Gjorgji Efremov” gjithashtu beson se vendi nuk duhet të mbyllet dhe se vaksinimi parandalon një format e rënda të sëmundjes.
“Nga përvoja unë jam optimist, ne do të merremi me këtë sëmundje edhe për dy vjet të tjera, por shpresoj se nuk do të jetë në formën që ishte,” tha Aleksandar Dimovski.
Ndryshe, në RMV vaksinimi bëhet me “Pfizer”, “Sinovak” dhe “AstraZeneka”. Deri më tani, 390,623 qytetarë janë vaksinuar, dhe 492,662 qytetarë janë regjistruar për vaksinim. Nga 12 korriku, të gjithë qytetarët do të jenë në gjendje të vaksinohen pa termin. Filipce gjithashtu njoftoi se nga 12 korriku, me “Pfizer” do të mund të vaksinohen fëmijët nga 12 deri në 16 vjeç.
