PADRONË, BUKË DHE FESTA
“Panem et circenses” tha poeti romak Juvenali.
Sa më shumë të kënaqur vetëm me bukë e festa.
Sa më shumë të mpirë.
Sa më shumë indiferentë ndaj jetës së përbashkët.
Sa më shumë njerëz që u ikin detyrave shoqërore.
Sa më shumë njerëz që besojmë se jetojnë në vendin më të bukur e më të lumtur.
Udha drejt pushtetit ushqehet me miell dhe spektakle.
”Bukë e festa” që ta harrojmë përditshmërinë e lodhshme.
Që të dalim nga realiteti.
Që të hyjmë në botën e mirazheve.
Që të besojmë se jemi qendra e botës.
Që të besojmë në lavditë e historisë.
Që të lartësojmë kreshnikë imagjinarë.
Që t’u besojmë verbërisht idhujve të cilët na kanë premtuar të ardhmen e ndritur.
Sa më shumë festa, mendime të lodhshme, heronj dhe histori të shkruar nga fituesit.
Sa më shumë kremtime fitoresh imagjinare, më të trishta se sa humbjet.
Sa më shumë fshatra Potemkini, që ta mashtrojmë prijësin se vërtet ka bërë vepra të përjetshme.
Sa më shumë keqzanim artistësh të kënaqur nga lajkat e prijësve.
Spektakle, sa më shumë spektakle.
Sa më shumë reklamë dhe mitologji moderne.
Sa më shumë banalitete dhe sa më pak përqendrim te problemet reale jetësore.
Bukën e përditshme dhe festat falna sot!
Shkrimi është shkruar enkas për Portalb.mk. Të drejtat e publikimit i kanë vetëm Portalb.mk dhe autori, sipas marrëveshjes mes tyre.
