RMV, edhe një deputet pozitiv me koronavirus

F. I. 23:48, 10-10-2020

Deputeti i LSDM-së qeveritare Llaze Tanevski nga Ohri është pozitiv me koronavirus. Ai në profilin e tij në Fejsbuk publikoi se është i infektuar, ndërsa familja e tij janë testuar dhe se të gjithë janë negativ, njofton Portalb.

“Dua t’ju informoj se për shkak të një udhëtimi të paevitueshëm, me vetëiniciativë bëra testim për Kovid-19. Për fat të keq, edhe krahas respektimit të të gjithë masave dhe protokolleve nga ana ime, i njëjti është pozitiv. Njëherit, dua t’ju njoftoj se anëtarët e familjes time janë testuar dhe të gjithë janë negativ. Unë ndjehem mirë dhe nuk kam kurrfarë simptome. Masën për izolim do ta respektoj si edhe të gjithë qytetarët e vendit tonë”, ka shkruar Tanevski.

Ai ka apeluar deri te qytetarët që të jenë maksimalisht të kujdesshëm.

Paraprakisht, sot nga Kuvendi i Republikës së Maqedonisë së Veriut njoftuan se deputeti Ismail Jahoski është pozitiv me koronavirus.

“Në përputhje me simptomat e shfaqur, deputeti Ismail Jahoski është testuar dhe testi i tij është pozitiv në KOVID-19. Për shkak të kësaj, a gjithë me qëllim që i njëjti të jetë nën mbikëqyrjen e personave profesionist me qëllim që të parandalohet zhvillimi i komplikimeve të padashura, deputeti Jahoski është hospitalizuar në Klinikën Infektive në Shkup”, potencojnë nga Kuvendi.

Nga atje apelojnë te të gjithë deputetët e tjerë, përveç në Kuvend, t’u përmbahen masave të mbrojtjes së shëndetit kolektiv edhe në kushte shtëpiake, sidomos në kontaktet me më të afërmit.