“Bomba” të reja në të cilat Mickoski bisedon me tetë deputetët e pavarur për Ligjin e PP-së
Në ditën e fundit të fushatës zgjedhore në kanalin Youtube u paraqitën incizime të reja në të cilat dëgjohet se si lideri i VMRO-DPMNE-së Hristijan Mickoski ka pasur takime të fshehta me tetë deputetët e përjashtuar të cilët i ka bindur të mos votojnë për Ligjin e Prokurorisë Publike.
Mickoski u thotë deputetëve se pushteti dëshiron në mënyrë ilegale t’i dërgojë rastet nga Prokuroria Speciale Publike në Prokurorinë Publike dhe potencon se pushteti ka për qëllim të vazhdojë me shantazhet dhe presionet ndaj kundërshtarëve, transmeton MIA.
Në një incizim, Mickoski u flet se si ai ka thënë në të gjitha komitetet komunale partiake të mos i sulmojnë deputetët e pavarur, ndërsa në një incizim tjetër dëgjohet se si u thotë se do të vjen dita kur do të zbulohet e vërteta dhe se ata dhe deputetët do të munden pas zgjedhjeve ta zbulojnë të vërtetën e opinionit.
Grupi i pavarur i deputetëve të VMRO-DPMNE-së e dënoi incizimin dhe publikimin e bisedave të cilat, siç potencojnë, janë mbajtur në takim me kryetarin e partisë Hristijan Mickoski të mbajtur në zyrën e koordinuesit Nikolla Micevski në Kuvend.
Kërkojnë nga kompetentët të hetojnë, kush, si dhe pse i ka incizuar bisedat.
Në kumtesë dërguar deri te opinioni, deputetët theksojnë se në kanalin Jutjub janë publikuar vetëm pjesë nga disa sekonda, ndërsa takimi dhe biseda me Mickoskin ka zgjatur më shumë.
“Si grup i deputetëve distancohemi nga lojërat e tilla të cilat dukshëm janë regji e re e dikujt i cili pranë nesh, ka qenë i pranishëm në takim, me qëllim të distancimit tonë. Sikur edhe deri tani, GPD e VMRO-DPMNE-së mbetet transparente ndaj opinionit dhe e ndershme në qasje. Përpjekjet tona gjithmonë ishin të sinqerta dhe në interes të institucioneve funksionale”, thuhet në kumtesë.
