RMV, shoqëria civile reagon për shkak të ridedikimit të fondeve për mjedisin jetësor nga Buxheti

Njëzet e dy organizata qytetare i dërguan letër Qeverisë dhe presidentit të shtetit dhe kryetarit të Kuvendit, në të cilën theksojnë se zbatimi thelbësor dhe i vazhdueshëm i transparencës dhe qeverisjes së mirë është më i rëndësishëm në këto periudha të vështira, në mënyrë që të mos cenohen të drejtat e njeriut, sundimi i brishtë i ligjit dhe vendimmarrja demokratike e pranishme në shoqërinë tonë. Ata siç theksohet në kumtesën e dërguar nga WWF Adria, reagojnë për ridedikimin e fondeve për mjedisin jetësor nga buxheti.

“Organizatat qytetare e kuptojnë që qeveria jonë punon në kushte ekstreme. Megjithatë ato i bëjnë thirrje qeverisë ta shtyjë çdo vendim që nuk është aktualisht i rëndësishëm për shëndetin dhe sigurinë e njeriut, për të cilin nuk mund të sigurohet transparenca dhe pjesëmarrja e rëndësishme”, theksohet në kumtesën e WWF Adria.

WWF, Eko-Vetëdija, IDSCS, Fondacioni i Shoqërisë së Hapur, Platforma maqedonase kundër varfërisë dhe organizata të tjera japin disa rekomandime që mund ta përshpejtojnë zhvendosjen në drejtim të ekonomisë e cila është neutrale në aspektin klimatik dhe e cila e mbron dhe ripërtërin botën tonë natyrore, shëndetin dhe mirëqenien.

Organizatat i bëjnë thirrje qeverisë ta mbështesë dhe forcojë zbatimin dhe financimin e standardeve dhe politikave ekzistuese mjedisore për  zgjidhjen e krizës klimatike, humbjen e diversitetit biologjik dhe ndotjen e mjedisit jetësor, transmeton MIA.

“Buxheti për projekte të tilla nuk guxon të shkurtohet dhe ridedikohet, të bëhet investim serioz në ngritjen e vetëdijes dhe edukimit për të drejtat e njeriut, zhvillimin e qëndrueshëm dhe mbrojtjen e natyrës, duke e forcuar shoqërinë tonë për t’u përballur me sfidat e ardhshme”, theksojnë organizatat.

Sektori i shoqërisë civile bën thirrje për ndarjen e fondeve stimuluese të kushtëzuara nga zbatimi i masave të Marrëveshjes së Gjelbër Evropiane dhe Marrëveshjes së Parisit, në mënyrë që të lëvizë transformimi i ekonomisë sonë drejt të qëndrueshmes. Të nisen iniciativa serioze të qëndrueshme në përputhje me interesin publik dhe t’u ofrohet mbështetje organizatave (lokale) qytetare, theksohet në kumtesën dorëzuar nga WWF Adria.