Falja e paligjshme e Ivanovit, Murati: Gjykata Kushtetuese punon me kujdes në këtë lëndë
Kryetari i Gjykatës Kushtetuese, Sali Murati në një deklaratë për mediat sot në Tetovë ka theksuar se nuk do ta komentojë lëndën rreth ligjit për falje dhe se procedura po vazhdon, njofton Portalb.mk.
“Në lidhje me procedurën ne me kujdes të veçantë u qasemi të gjitha lëndëve. Lëndët vazhdojnë dhe nuk është me rëndësi të veçantë të prejudikojë ose të komentojë lëndë që janë në rrjedhë. Ne me kujdes të thellë punojmë me lëndët, opinioni do të informohet me kohë nëpërmjet shërbimeve tona, zëdhënësit, ueb-faqes dhe mjeteve tjera për informim publik në lidhje me aktivitetet e ndërmarra nga Gjykata Kushtuese”, tha Murati.
Në pyetje gazetareske nëse këto aktivitete të Gjykatës Kushtetuese ndikojnë në Ligjin për Falje në Kuvend, Murati tha se ajo është temë shtesë.
“Ajo është temë tjetër, në tjetër rast do të deklarohemi”, shtoi Murati.
Ndryshe, me propozim të gjykatësit Osman Kadriu, Gjykata Kushtetuese me shumicë votash ka votuar që ta anulojë vendosjen për propozim-vendimin për Ligjin për Plotësim të Ligjit për Falje, për të cilin javën e kaluar u ngrit procedurë.
Qeveria e Maqedonisë së Veriut e ka miratuar mendimin e Ministrisë së Drejtësisë që të pranohet iniciativa për interpretim autentik i nenit 11-a nga Ligji për falje, të dorëzuar nga deputetët e LSDM-së.
Nga ana tjetër kryeparlamentari Talat Xhaferi deklaroi që me këtë do të fillojë procedura parlamentare për kërkesën për interpretimin autentik, por paralajmëroi që edhe Komisioni Ligjdhënës-juridik (KLJ) edhe mendimi i Qeverisë të arrijnë tek ai në kohë sa më të shpejtë, ndërsa seancë plenare mund të caktohet vetëm pas debatit për buxhetin të Komisionit për Financa dhe Buxhet, pas 11 dhjetorit
Ndryshe, propozimi për rishqyrtimin e nenit 11-a të Ligjit për falje thotë se presidenti mund të revokojë amnistinë e dhënë. Me këtë nismë pohohet e kundërta, se amnistia që është dhënë një herë nuk mund të revokohet.
Nëse kjo nismë kalon në Gjykatën Kushtetuese, do të aktivizohen amnistitë që iu dhëna më shumë se 50 të dyshuarve, të pandehurve, dëshmitarëve në procedurat e PSP, për të cilat ish presidenti Gjorge Ivanov atëherë arriti të mbledhin të dhëna, nga prokuroria e atëhershme e Marko Zvrlevskit, se kundër tyre ishim nisur procedura dhe i amnistoi.
Ish kryeministri i arratisur Nikolla Gruevski, ish ministrja e Punëve të brendshme Gordana Jankulloska, Martin Protogjer, Mile Janakieski, Goran Grujevski, Nikolla Boshkoski, Toni Jakimovski, Edmond Temellko, ish kryetarët e komunave Toni Trajkovski dhe Vlladimi Talevski, pastaj të gjithë anëtarët e njësitit alfa të akuzuar në “Tortura”, Bedredin Ibraimi, Menduh Thaçi, gjyqtarja Svetllana Kostova, ish-ministri Lupço Dimovski … si dhe i ndjeri Kosta Krpaç, por edhe Zarko Llukovski, i cili vdiq sot, janë ndër zyrtarët e akuzuar dhe të dyshuar t ë cilët ishin amnistuar. Gruevski dhe Jankulloska janë dënuar dhe Gruevski, Ibraimi, Mijallkov dhe Thaçi janë dënuar me burg, por asnjëri prej tyre nuk është në burg, të gjithë janë në procedurë të ankimimit.
Sipas Ministrisë së Drejtësisë, Ligji për falje është ndryshuar dhe është plotësuar në vitin 2009, kur ishte shfuqizuar neni 11-a i cili e ka përmbajtur mundësinë për falje pa zbatimin e procedurës.
Sipas këtij mendimi, në mars të vitit 2016-të, Gjykata Kushtetuese e ka shfuqizuar Ligjin për ndryshim dhe plotësim të Ligjit për falje nga viti 2009, por me shfuqizimin e ligjit nga viti 2009, nuk kthehet në fuqi dispozita nga neni 11. Kjo do të thotë se presidenti i Republikës nuk ka pasur, e as që ka mundësi juridike të falë pa u zbatuar procedura në bazë të këtij neni dhe sipas kësaj të gjithë aktet për falje të presidentit të shtetit bazohen në nenin 11 nga Ligji për Falje, dhe të njëjtat janë të paligjshme.
