LSDM: Nëse nuk miratohen ndryshimet kushtetuese, menjëherë do të shkohet në zgjedhje parlamentare

Bordi  Ekzekutiv i LSDM-së në mbledhjen e mbrëmshme ka përfunduar se deputetët e Kuvendit duhet ta ndjekin vullnetin e shprehur të shumicës prej mbi 600 mijë qytetarëve, të marrin përgjegjësi dhe të përshpejtojnë proceset për anëtarësim në NATO dhe BE. Nëse nuk mundet kështu, siç thuhet në kumtesën e partisë, atëherë menjëherë do të shkohet në zgjedhje parlamentare, transmeton Portalb.mk.

Bordi Ekzekutiv, siç thuhet në kumtesë, i ka autorizuar liderin e LSDM-së, Zoran Zaev dhe koordinatorin e grupit parlamentar, Tomisllav Tuntev që t’i ndërmarrin të gjitha hapat e nevojshëm në drejtim të përgatitjes së zgjedhjeve të parakohshme parlamentare.

“Shumica e qytetarëve, mbi 90 për qind që dolën të votojnë, votuar “Për” dhe porositën se Republika e Maqedonisë duhet ta pranojë marrëveshjen me Greqinë dhe të bëhet anëtare e NATO-s dhe BE-së me ruajtjen e identitetit maqedonas. Anëtarët e Bordit Ekzekutiv, njëzëri përfunduan se kur ka vullnet të shumicës, deputetët në Kuvendin e Republikës së Maqedonisë duhet ta ndjekin zërin e shumicës prej mbi 600 mijë qytetarëve, të marrin përgjegjësi dhe të përshpejtojnë proceset për anëtarësim përfundimtar në NATO dhe BE. Nëse kjo nuk është e mundur dhe VMRO-DPMNE edhe më tej e frenon të ardhmen e qytetarëve dhe e zhyt vendin në humnerë, atëherë nuk ka opsion tjetër përveç zgjedhjeve të parakohshme parlamentare, ku qytetarët do të vendosin për të ardhmen e tyre”, thuhet në kumtesën e LSDM-së.

Anëtarët e Bordit kanë vlerësuar se duhet të shfrytëzohen të gjitha mundësitë demokratike, t’u mundësohet qytetarëve ta ndjekin zërin e qytetarëve dhe të sigurojnë anëtarësim të Maqedonisë në NATO dhe BE.

“Askush nuk duhet të besojë në amnisti. Bëhet fjalë për çështje shumë të rëndësishme, për të ardhmen e vendit, për të ardhmen e qytetarëve dhe fokusi i të gjitha partive politike duhet të jetë kjo çështje. Çdo gjë tjetër është lojë me të ardhmen dhe përpjekje për kthimin e vendit në izolim”, thuhet në kumtesën partiake.

Në seancë është përfunduar se referendumi të dielën ka kaluar në mënyrë të qetë, të drejtë dhe me atmosferë demokratike.