Trump redukton standardet e emetimit të kohës së ish-presidentit Obama
Adminstrata e presidentit amerikan, Donald Trump, ka propozuar rregulla të reja që kanë për qëllim reduktimin e standardeve të emetimit të qymyrit nga ish-presidenti Barack Obama si një përpjekje për të frenuar ndryshimet klimatike, transmeton Anadolu Agency (AA).
Në një deklaratë ku njoftohet rregulli i ri i propozuar, Agjencia për Mbrojtjen e Mjedisit (EPA) e quajti Planin e Energjisë së Pastër të Obama-s për vitin 2015 “tepër urdhërues dhe të rëndë”.
Gjykata Supreme e pezulloi rregullin në vitit 2016 pas një veprimi ligjor nga avokatë të shumtë republikanë të shtetit dhe grupe të avokatisë së industrisë.
“Alternativa e presidentit Trump, që njihet si Rregulli i Përballueshëm i Energjisë së Pastër, fuqizon shtetet, promovon pavarësinë e energjisë dhe lehtëson rritjen ekonomike dhe krijimin e vendeve të punës”, tha EPA.
Plani heq disa kufizime në termocentralet me qymyr, duke zhvendosur rregulloret e emetimeve nëpër shtete.
Kundërshtarët e masës kanë paralajmëruar se ndryshimet do të rrisin emetimet e karbonit të SHBA-ve, por administratori në detyrë i EPA-së, Andrew Wheeler, tha se rregulli i ri “do të rivendosë sundimin e ligjit dhe do të fuqizojë shtetet për të reduktuar emetimet e gazrave serrë, si dhe do të ofrojë energji moderne, të besueshme dhe të përballueshme për të gjithë amerikanët”.
Këshilli i Mbrojtjes së Burimeve Natyrore ka ngelur i palëkundur në qëndrimin e tij, duke thënë se, “Bota është në zjarr dhe administrata e presidentit Trump dëshiron ta bëjë atë më keq”.
“Ky Plan i Energjisë së Ndotur është i mbushur me mashtrime. Ai do të thotë më shumë ndotje nga ndryshimet klimatike nga termocentralet. Kjo është një recetë për fatkeqësinë klimatike”, tha Rhea Suh, presidente e Këshillit.
Trump gjatë kohë ka përbuzur atë që ai dhe republikanët e quajnë “luftë mbi qymyrin” të nxitur pjesërisht nga plani i Obamas. Por, largimi në rritje nga qymyri bazohet gjithashtu në rënien e kostove që lidhen me alternativa më të pastra, si gazi natyror, era dhe energjia diellore.
Përveç zhvendosjes së rregullimit të emetimeve nëpër shtete, plani i presidentit Trump u lejon shteteve të lehtësojnë rregulloret për termocentralet që kanë nevojë për përmirësime.
Trump pritet të paralajmërojë planin gjatë një tubimi në Virginia, shtet i mbështetur gjatë në qymyrin e maleve të saj për të nxitur aktivitetin ekonomik.
