Trump do merret në pyetje, pritet të lëshohet fletëthirrja, do pyetet për rusët
Këshilltari Special Robert Mueller paralajmëroi se ai mund të lëshojë një fletë thirrje për Donald Trump që ai të dalë para një jurie në kuadër të hetimit mbi përzierjen e supozuar të Rusisë në zgjedhje.
Sipas mediave amerikane, Mueller e ka sugjeruar mundësinë gjatë bisedimeve me avokatët e Trump në mars. Ai tha se thirrja mund ta detyronte presidentin të përballej me hetuesit. Besohet se kjo është hera e parë që këshilltari special ka ngritur mundësinë e detyrimit të Trump për të dëshmuar, transmeton TCH.
Gjatë takimit të marsit, avokatët e Trump kanë insistuar se presidenti nuk është i detyruar të përballet me pyetjet e hetuesve federalë në lidhje me hetimin mbi Rusinë, shkruan “Washington Post”, që citon katër persona në dijeni të detajeve. Sidoqoftë, ekipi i Mueller mësohet se është përgjigjur duke sugjeruar se ata mund të lëshojnë një fletë thirrje nëse Trump refuzon.
Ata kanë rënë dakord ti sigurojnë avokatëve të presidentit më shumë informacione specifike në lidhje me pyetjet që do të donin ti bënin Trump. Një ish avokat i presidentit, John Dowd, po ashtu ka thënë për agjencinë e lajmeve “Reuters” të martën se Mueller e ka përmendur në takim mundësinë e detyrimit të Trump për tu përballur me marrjen në pyetje. Dowd që dha dorëheqjen rreth një javë e gjysmë pas takimit, tha se i kish thënë hetuesve se hetimi nuk ishte një lojë, duke shtuar se ju po ngatërroheni me punën e presidentit të shteteve të bashkuara të Amerikës.
Të hënën, presidenti kritikoi “The New York Times” për botimin e më shumë se 40 pyetjeve që Mueller do t’i bëjë atij në kuadër të hetimit mbi Rusinë. Në një postim në “Twitter” ai tha se rrjedhja e informacionit në media ishte për të ardhur keq.
“Duket shumë e vështirë të pengosh drejtësinë për një krim që asnjëherë nuk ka ndodhur”, shkruante më tej ai. Në listën e pyetjeve të Mueller ka pyetje që variojnë që nga motivet për shkarkimin e ish drejtorit të FBI James Comey majin e shkuar e deri tek trajtimi i prokurorit të përgjithshëm Jeff Sessions pas përjashtimit të tij nga hetimi për Rusinë.
