Trump dhe Modi diskutojnë përmes telefonit për Afganistanin dhe myslimanët Rohingya
Shtëpia e Bardhë ka njoftuar se presidenti amerikan, Donald Trump ka biseduar përmes telefonit me kryeministrin indian, Narendra Modi, për të diskutuar tema rajonale, duke përfshirë luftën në Afganistan dhe gjendjen e vështirë të refugjatëve Rohingya në Burma, transmeton REL.
Të dy liderët kanë përsëritur përkushtimin e tyre për sigurinë e Afganistanit, është thënë në deklaratën e Shtëpisë së Bardhë.
Uashingtoni ka njoftuar kohën e fundit se është duke pezulluar ndihmën për Pakistanin, pas supozimeve se Islamabadi ka ofruar streha të sigurta për militantët që po veprojnë në Afganistan.
Pakistan i hedh poshtë akuzat.
Në të njëjtën kohë, administrata amerikane ka nisur përpjekjet për të rritur marrëdhëniet ushtarake dhe ekonomike me Indinë, duke synuar balancimin e politikës së jashtme të Kinës në Azi.
India ka rritur ndihmën për Afganistanin në vitet e fundit dhe i ka premtuar Kabulit se do t’i ofrojë më shumë armë.
Trump dhe Modi kanë diskutuar edhe situatën e më shumë se 680,000 myslimanëve Rohingya, të cilët kanë ikur nga Burma për në Bangladeshin fqinj.
Forcat ushtarake në Burma janë akuzuar për keqtrajtim të mijëra civilëve Rohingya dhe djegien e fshatrave, pas sulmeve të militantëve Rohingya në verën e kaluar.
Burma e njohur ndryshe edhe si Mianmar, ka kundërshtuar sulmet ndaj civilëve duke thënë se në operacionin e tyre, synim kanë pasur ekstremistët Rohingya.