PSP-ja kërkon që Gruevskit, Protogjerit dhe Dimovskit t’u konfiskohet pasuria me vlerë prej 2.2 milionë euro
Prokuroria Speciale Publike (PSP) në akuzën për rastin “Titanik” kërkon që liderit të VMRO-DPMNE-së, Nikolla Gruevskit, ish-shefit të kabinetit të tij, Martin Protogjerit, deputetit të tanishëm të VMRO-DPMNE-së në Kuvend, Ilija Dimovskit dhe të akuzuarit Leko Ristovski në mënyrë solidare t’u konfiskohet pasuria me vlerë prej 2.2 milionë euro, njofton Portalb.mk.
Kjo shumë, sipas PSP-së, ka të bëjë me fondet e siguruara në mënyrë joligjore për fushatat zgjedhore të partisë në vitin 2011, 2013 dhe 2014.
Prokuroria Speciale Publike në faqen e saj të internetit i ka publikuar aktakuzat për të gjitha 20 rastet që i akuzon, të cilat lidhen dhe dalin nga bisedat e përgjuara.
Vetëm, siç shihet, nuk është publikuar përmbajtja për akuzat për rastet “Target” dhe “Fortesa”.
Në akuzat e publikuara mund të shihen momente interesante dhe kuriozitete për të akuzuarit në rastet dhe për mënyrat me të cilat janë kryer veprat penale për të cilat akuzohen.