Rama: Pres që Shqipëria sivjet t’i fillojë negociatat me BE-në

Kryeministri i Shqipërisë Edi Rama shprehu besimin se ketë vit do të çelen bisedimet për anëtarësimin e Shqipërisë në BE., transmeton TCH.

“Ne nuk kemi alternativë tjetër. Ne presim që bisedat me BE-në të nisin këtë vit. Nuk do çuditesha edhe po të mos fillonin. Jo sepse nuk i bëmë ne detyrat e shtëpisë, por sepse nuk mund të mbështetesh shumë te BE për sa i përket angazhimeve me vendet si Shqipëria. Megjithatë, në fund të fundit ajo që mendoj unë që është e rëndësishme: është që ne të vazhdojmë në këtë drejtim dhe me këtë vizion drejt BE-së. Pasi ne jemi edhe shteti më eurocentrik në rajon”, tha Rama në intervistën që dha për “France 24”.

Rama u shpreh se për disa Evropa është thjesht financa, ndërsa për Shqipërinë është projekti më i qëndrueshëm i paqes.

“BE është në fakt ai që na mban ne për sa i përket frymëzimit tonë. Nëse BE do të largohet nga ëndrra që ne kemi sigurisht që do të shohim alternativa të tjera, çfarë do të dalin. Mund të ndodhe nëse BE është thjesht taktikë”, u shpreh Rama.

Kryeministri i Shqipërisë. Edi Rama  i tha gazetares franceze se ekonomia është në rritje në Shqipëri, dhe këtë vit po luftohet fuqimisht kultivimi i kanabisit.

“Kemi pasur një kthesë këtë vit për situatën e kanabisit, kemi pasur një ulje dramatike. Unë kam besim që në fund të vitit ka për të qenë histori”, tha Rama.