Rama vlerëson se marrëdhëniet Kosovë-Serbi janë më mirë se që kanë qenë ndonjëherë
Kryeministri i Shqipërisë, Edi Rama, deklaroi se marrëdhëniet mes Kosovës dhe Serbisë janë më mirë se që kanë qenë ndonjëherë, por theksoi se mbyllja e dialogut mes dy vendeve do të ishte mbyllja e një kapitulli konfliktesh në rajon.
Duke folur në Forumin Ekonomik “Delphi 2023, Ëorld Affairs” të mbajtur në Greqi, Rama tha se i gjithë Ballkani Perëndimor gjendet në një situatë shumë më të mirë për shkak se shtetet i flasin njëra-tjetrës, ndryshe nga vite më parë, transmeton Koha.net.
Në Greqi, Rama është takuar edhe me homologun e Kosovës, Albin Kurti. Ai ka ndarë disa fotografi nga takimi i tyre.
“Dialogu Kosovë-Serbi do thosha është çështja që mbetet ende çështje e madhe dhe zgjidhja e kësaj çështjeje do të thotë të mbyllësh një kapitull përgjithmonë, një kapitull të shumë kapitujsh gjaku dhe konfliktesh. Kjo është diçka shumë e rëndësishme dhe strategjike. Megjithatë, edhe sa i takon këtij elementi të veçantë, kësaj çështjeje të veçantë, marrëdhëniet mes Kosovës dhe Serbisë nuk kanë qenë asnjëherë aq të mira sa janë aktualisht. Pra, janë marrëdhënie shumë të mira krahasimisht siç kanë qenë këto marrëdhënie më përpara. Megjithatë, ka ende shumë për të bërë për të përmirësuar këtë marrëdhënie”, deklaroi Rama.
Duke folur për mungesën e stabilitetit në rajon për shkak të ndikimit rus, Rama tha se Shqipëria dhe Kosova janë të dy vendet e Ballkanit Perëndimor ku nuk ka aspak ndikim rus.
“Kur flitet për aspektin gjeopolitik dhe politikën ndërkombëtare të vendeve të Ballkanit Perëndimor, ne kemi një panoramë shumë komplekse. Kemi 3 shtete anëtare në NATO, Shqipëria, Maqedonia e Veriut dhe Mali i Zi, por Shqipëria nuk ka fare ndikim rus ndërkohë që Mali i Zi dhe Maqedonia e Veriut kanë një influencë ruse shqetësuese. Nga ana tjetër, kemi Serbinë, Bosnje-Hercegovinën dhe Kosovën. Kosova është si Shqipëria, është tërësisht e harmonizuar në të njëjtën linjë me Shtetet e Bashkuara dhe BE-në, nuk kanë ndikim rus, ndërkohë që Serbia apo Bosnja kanë shumë ndikim rus. Nuk flitet këtu vetëm për qeverisjen, por edhe në popullsi”, theksoi Rama.
