LSDM: Ivanov ta jep mandatin, programi i ri për Qeveri reformuese është garanci për Maqedoni unitare
Sot partia e Lidhjes Social Demokrate e Maqedonisë nëpërmjet një kumtese kërkon që Ivanov t’ia jep mandatin ngaqë të vetmit që veprojnë në kundërshtim me interesat shtetërore janë Nikolla Gruevski dhe VMRO-DPMNE, njofton Portalb.mk.
“Nikolla Gruevski dhe VMRO-DPMNE janë të vetmit që punojnë në kundërshtim me interesat shtetërore të qytetarëve të Republikës së Maqedonisë, nëpërmjet konflikteve, dhunës dhe incidenteve të nxitura me udhëheqësinë e brendshme dhe të jashtme në tentim për t’iu shpëtuar përgjegjësive për keqpërdorimet dhe krimet e bëra”, thuhet në kumtesën e LSDM-së.
Nga LSDM gjithashtu thonë se “qytetarët kërkuan politikë të re reale e cila do t’ju mundësonte jetesë dinjitoze, rroga më të larta dhe standard cilësor për jetë”.
Ata gjithashtu theksojnë se programi i ri qeveritar paraqet garanci për unitaritetin e Maqedonisë dhe për këtë Gjorge Ivanov është i detyruar të respektojë Kushtetutën dhe t’ia jep LSDM-së mandatin për formim të Qeverisë.
“Programi i ri i Qeverisë reformuese garanton unitaritetin e shtetit dhe siguron përparim dhe zhvillim të Maqedonisë. Për këtë Gjorge Ivanov është i detyruar që të respektojë Kushtetutën, t’ia jep mandatin Zoran Zaevit ngaqë ai siguroi 67 nënshkrime për formim të Qeverisë dhe të mundësojë transfer të qetë të pushtetit”, thonë nga LSDM.
