VMRO dhe LSDM bëhen bashkë kundër PDSH-së
VMRO – DPMNE dhe LSDM janë bërë bashkë dhe kanë votuar kundër propozimit të Partisë Demokratike Shqiptare, e cila sot në Kuvend propozoi ndryshimin e Kodit Zgjedhor me qëllim që të barazohet vota e qytetarëve të Maqedonisë, çështje kjo që ka të bëjë me barazimin e njësive zgjedhore, raporton Portalb.
Nuk ishte e mjaftueshme as përkrahja dhe vota e deputetëve të BDI-së.
“LSDM e dëshmoi veten, ne ju themi atyre që pretendojnë që të thirren edhe në vullnetin e qytetarëve shqiptarë ta shohin sot LSDM-në e vërtetë. Dita e mirë shihet që në mëngjes. E keni gabim nëse doni ta fitoni armikun tuaj politik VMRO – DPMNE-në me votat e shqiptarëve”, tha nga foltorja e Kuvendit deputeti i BDI-së, Xhevat Ademi, pas votës kundër të LSDM-së, për propozimin e PDSH-së, transmeton Portalb.
Deputeti i PDSH-së, Imer Aliu, ka sugjeruar deputetin Ademi, të mos merret me VMRO-në dhe LSDM-në, por të japin përgjegjësi, për atë që ata kanë bërë si parti politike.
“Ju keni votuar dispozita për ta zhvlerësuar votën e shqiptarëve. Lëreni tash VMRO-në dhe LSDM-në. Se ju shohim tash kur të votohet buxheti. Të shohim a do të votoni kundër aty ku diskriminohen shqiptarët”, theksoi deputeti Aliu. /Portalb
