MARRËVESHJE PËR “MARRËVESHJEN”

Mos ju vijë çudi që votuesit fiktivë maqedonas nuk u hoqën nga lista edhe pas zënkave ndërmjet dy partive politike ekskluzivisht maqedonase. Them ekskluzivisht maqedonase, pavarësisht se me çfarë “cellofanësh qytetarë”  mbështillen, sepse e duan vetëm shqiptarin me identitetin e Kokosë, pra shqiptarin si origjinë, por që mendon maqedonisht, që është vetëm brenda skemave të tyre të të menduarit e të të vepruarit.

Kam shumë arsye të dyshoj se ka filluar zbatimi i “marrëveshjes” së pashkruar që nga koha e pavarësimit të Maqedonisë nga Jugosllavia federale.

Sipas “marrëveshjes” partitë dominuese maqedonase, për të ruajtur dominimin demografik maqedonas kundrejt shqiptarëve, shpikën qindra mijë votues fiktivë, që dyshohet se i ndanin mes vete.

Institucionet relevante ndërkombëtare përgjatë këtyre viteve e kanë theksuar këtë mashtrim.

Në Maqedoni ka pasur dhe ka votues fiktivë. Këtë e di çdokush dhe askush nuk ka nevojë që të na bind. Ky shtet ka pothuajse po aq votues sa ka banorë. Sipas kësaj logjike i bie se këtu kanë të drejtë vote edhe foshnjet e porsalindura. E megjithatë jo të gjithë kanë të drejtë vote, pavarësisht se çfarë na thotë kushtetuta e ligjet. Dikush është privuar nga e drejta e votës. Është nxjerrë përtej ligjeve që thuhet se i garantojnë këtë të drejtë qytetare.

Shifrat e përmendura kohëve të fundit nga LSDM për qindra mijë votues fiktivë duket se janë të sakta. Këto shifra i dinë të dy partitë politike maqedonase. Por me kalimin e kohës askush më nuk i përmend.

Si duket kur pushteti i Gruevskit filloi mos ja jepte pjesën e votuesve fiktivë LSDM-së, atëherë filluan përplasjet për pastrim të listës zgjedhore. Por lista nuk u pastrua dhe partitë maqedonase sërish e heshtën këtë problem. Si duket u arrit marrëveshja që të realizohej “marrëveshja”. Sakaq  votues fiktivë u shpallën shqiptarët, pra fajtorët kujdestarë për shkak të mungesës së kujdesit nga ata që morrën votën e tyre. Kështu u hoqën nga lista 40 mijë votues, shumica shqiptarë dhe ca votues maqedonas, sa mos thuhej se lista ishte “etnikisht e pastër”.

Kohëve të fundit janë bërë shumë kompromise. Si duket edhe heshtja e partive maqedonase për votuesit fiktivë dhe regjistrimin korrekt është kompromis. Diskursi për “shtet qytetar” nuk është tjetër veçse dredhia e radhës që ua bëjnë shqiptarëve pa asnjë akces në institucionet kryesore në shtet.

Ai që manipulon me statistikat, manipulon me gjithçka. Pastaj pason mashtrimi.