Vetëm VMRO-DPMNE shkon në zgjedhjet e 5 qershorit, partitë tjera i bojkotojnë
VMRO-DPMNE-ja dorëzoi lista të kandidatëve, LSDM-ja, BDI-ja dhe PDSH-ja nuk shkojnë në zgjedhje
VMRO-DPMNE-ja në Komisionin Shtetëror Zgjedhor (KSHZ) mbrëmë dorëzoi lista me emrat e kandidatëve për deputetë, për zgjedhjet e parakohshme parlamentare të caktuara më 5 qershor. Lista deri te KSHZ-ja, siç paralajmëruan paraprakisht, nuk kanë dorëzuar LSDM-ja, BDI-ja dhe PDSH-ja.
Listat me emrat e kandidatëve në KSHZ i dorëzuan përfaqësuesit e Unionit të forcave të reja të VMRODPMNE-së.
Kryetari i VMRO-DPMNEsë Nikolla Gruevski është bartës në njësinë e parë zgjedhore, në njësinë e dytë ministri i Punëve të Jashtme Nikolla Poposki, në të tretën koordinuesi i grupit të deputetëve Ilija Dimovski. Bartës i listës në njësinë e katërt është ministri i Shëndetësisë Nikolla Todorov, në të pestën Antonio Milloshovski, ndërsa deputeti Vllatko Gjorçev në njësinë e gjashtë zgjedhore.
Siç deklaroi kryetari i UFR-së, Vlladimir Nelovski, sipas VMRO-DPMN-Esë, janë plotësuar të gjitha kushtet për zgjedhje korrekte dhe demokratike. Deri te KSHZ-ja lista me kandidatë kanë dorëzuar edhe partia Lëvizja Popullore për Maqedoninë (LPM) e Janko Baçev dhe Partia Socialdemokrate e Maqedonisë e Branko Janevskit.
Sipas afatit kohor për kryerjen e veprimeve zgjedhore për zgjedhjet e parakohshme parlamentare më 5 qershor, mbrëmë në mesnatë skadoi afati për dorëzimin e listave për deputetë në Kuvendin e Republikës së Maqedonisë.
Pas marrjes së listave, KSHZ-ja ka 48 orë kohë për të konfirmuar nëse lista e kandidatëve është dorëzuar në afatin e konfirmuar dhe nëse është përbërë në pajtim me dispozitat e Kodit zgjedhor. Mangësitë eventuale, parashtruesi i listave do të duhet t’i largojnë gjithashtu në afat prej 48 orëve.
