BE vendos sot për Statusin e Shqipërisë
Ministrat e Jashtëm të Bashkimit Evropian sot do diskutojnë mbi vendimin, që do të marrë Këshilli Evropian për t’i dhënë ose jo statusin e vendit kandidat Shqipërisë.
Ministrat e Jashtëm dhe të Çështjeve Evropiane mblidhen sot paradite ndërsa janë liderët e BE-së ata që do të marrin vendimin përfundimtar në samitin e 19 dhjetorit.
Në takim do të shqyrtohet propozimi pozitiv, i bërë nga Komisioni Evropian këtë tetor për t’i dhënë Shqipërisë statusin e vendit kandidat. Pas dy refuzimesh në 2010 dhe 2011, KE i ofroi Shqipërisë tentativën e parë vitin e kaluar, duke i ofruar statusin kandidat me kusht, çka nuk u përmbush dot nga klasa politike shqiptare.
Euobersver.com paralajmëroi dje se Britania e Madhe e Holanda janë dy vendet që mund të bllokojnë sot vendimin për dhënien e statusit kandidat për Shqipërinë. Por po dje agjencia italiane e lajmeve ANSA, e cila njihet për burimet e saj në Bruksel, ka paralajmëruar për rezultatin: “Shqipëria merr nesër (sot) dritën jeshile”.
Komisioni Europian do t’i japë zyrtarisht ftesën Shqipërisë për të qenë vend kandidat për në BE, por një “po” e kushtëzuar. Sipas ANSA-s, Shqipëria mund të marrë statusin, por vetëm mbi bazën e një numri kushtesh që lidhen me procesin e reformave politike, që po zhvillohen në vend. Tani për tani fillimi i negociatave për anëtarësim nuk është përfshirë në propozimin e Komisionit Evropian.
Kushtet që do të shoqërojnë Shqipërinë – e cila ka aplikuar për anëtarësim më 27 prill të vitit 2009 – për pjesën e rekomandimit për statusin duhen plotësuar para muajit dhjetor, kur vendet anëtare do të marrin në shqyrtim rekomandimin e Komisionit, për të vendosur nëse vendi e meriton apo jo statusin kandidat.
Vendimi i parlamentit e detyron kryeministrin e Holandës Mark Rutte për të refuzuar propozimin e Komisionit Evropian për ti dhënë Shqipërisë statusin e vendit kandidat. Liderët e BE-së vendosin në unanimitet sa i përket të gjitha çështjeve mbi zgjerimin e BE-së, çka do të thotë se Shqipëria mund të humbasë një tjetër shans edhe këtë vit. Nëse do të jetë kështu, vendimi kundër pritet të zemërojë edhe Parlamentin Evropian.