Operacion Shqipëri-Mali i Zi-Itali, sekuestrohet rreth gjysmë ton drogë
Policia Shqiptare është njoftuar nga Guardia di Finanza se nga një mjet ajror ka identifikuar një gomone rreth 50-60 milje larg Barit, ndërsa më pas autoritetet shqiptare kanë angazhuar në det 8 mjete lundruese për patrullim.
Merepeza ka deklaruar se Policia Shqiptare vijoi kontrollin e hapësirës ujore duke koordinuar operacionin me Policinë Kufitare Malazeze, e cila angazhoi 2 mjete detare.
“Mjeti i dyshuar tip gomone që po lëvizte me shpejtësi në drejtim të vendit tonë u ndoq nga mjetet e Guardia di Finanza nga deti dhe nga ajri. Gjatë ndjekjes, shërbimet shqiptare me anë të radarit konstatuan se gomonia mori kursin në drejtim të ujërave ndërkombëtare përballë ujerave territoriale të Malit të Zi. Për t’u lehtësuar nga pesha dhe ecur më shpejt, trafikantët hodhën në det drogën, rreth 500 kilogramë, e cila u sekuestrua nga autoritetet italiane në ujërat ndërkombëtare”- deklaroi Merepeza gjatë konferencës për mediat.
Ndërkohë policia ka deklaruar se po vijojnë hetimet për zbulimin e autorëve të implikuar në këtë trafik ndërkombëtar droge.