Ngjarjet më të bujshme të showbiz-it për 2015, viti i ndarjeve dhe sherreve
2015-ta ka qenë një vit “i mbarë” për showbiz-in shqiptar. Ju risjellim ngjarjet të cilat kanë shënjuar 2015-ën, të paktën për showbiz-in.
Martesat
SINAN HOXHA
Dasma e këngëtarit tironc me vajzën nga Kumanova do të mbahet mend gjatë. Ceremonia e martesës së Sinanit dhe Andrrës bëri bashkë disa nga emrat më të spikatur të shoëbiz-it. E vështirë të harrohet marrja e nuses me helikopter.
ANJEZA SHAHINI
Edhe këngëtarja e mirënjohur i dha fund beqarisë. Dasma e saj me diplomatin anglez, u zhvillua në Toskana të Italisë. Anjeza do të mbetet në memorien tonë si një nuse e thjeshtë, por gjithsesi e mrekullueshme, si një princeshë.
VESA LUMA & BIG BASTA
Saranda ishte qyteti i përzgjedhur nga Vesa dhe Big Basta për të bërë ceremoninë e tyre. Këngëtarja kosovare do të mbahet mend si nusja ekstravagante që zgjodhi një fustan ndryshe nga ai klasiku. Natyrisht që, nuk ka se si të mos përmendet edhe kënga e dashurisë që Big Basta i këndoi bashkëshortes së tij.
Ndarjet
SONI MALAJ
Soni do të vihej në qendër të vëmendjes teksa nisi të përflitej si një thashethem. Megjithatë, asnjëri nga palët nuk e mohoi lajmin e ndarjes. Më tej Soni vijoi pjesëmarrjen në emisionin “Një javë”, duke lënë pas divorcin me Mirkon.
AURELA HOXHA
Lajmin për divorcin do ta jepte vetë ish-bashkëshorti i saj. Në media ai foli se Aurela e kishte dëmtuar moralisht dhe se nuk kishte ndërmend për një rikthim. Megjithatë, vetë shoëgirl-i u shpreh se nuk ndikohet nga fjalët negative dhe se ndihet e plotësuar me jetën e saj.
FLORIANA GARO
Lidhja e tyre dukej përrallore. Ai një biznesmen i suksesshëm, ajo një moderatore e adhuruar, por gjithçka ndryshoi shumë shpejt. Floriana dhe Tedi i dhanë fund lidhjes rreth një muaj më parë, duke mos dhënë shumë detaje. Ditët e fundit ishte moderatorja ajo që rrëfeu se kishte derdhur shumë lot për ish-të dashurin e saj.
ROVENA DILO
Pas 10 vitesh martesë, Rovena dhe Florian Riza deklaruan ndarjen e tyre. Por, si edhe në rastet e tjera, asnjë nga të dy nuk pranuan të bënin publike arsyet. Ndërkohë, Rovena vijoi krejt normalisht pjesëmarrjen e saj në “Dancing With The Stars”, ndoshta si një mënyrë për të kapërcyer më thjesht këtë divorc.
Sherret
FJOLLA MORINA
Konflikti që degjeneroi në dhunë, me ish-partnerin e saj, u shndërrua në lajmin e javës. “Bluetooth”-i ishte ai që zbuloi sherrin mes Fjollës dhe Flamurit, i cili e kishte goditur se nuk kishte dashur që këngëtarja të sillte në jetë vajzën e tyre.
FLORI & STINE
Dy këngëtarët venitën zhurmën mediatike të “Këngës Magjike”, duke bërë që mediat të fokusohen te sherri mes tyre. Versioni i Florit ishte se Stine e ka goditur për shkak të xhelozisë, por një fakt i tillë u mohua nga pala tjetër. Megjithatë, fotoja e Florit i gjakosur u shndërruar në një hit në rrjetet sociale.
LAERT VASILI & GERT FERRA
Pak javë më parë, “Bluetooth”-i do të sillte një sherr mes dy aktorëve. Me aq sa kishim mundësi të mësonin, Laerti dhe Gerti janë zënë në ambientet e një lokali, për një femër. Edhe pse palët nuk pranuan të flisnin mbi ngjarjen, dëshmitarët thanë se pati një dhunë të ashpër mes tyre.
RONELA HAJATI & SAMANTA KARAVELLA
Ato ishin mikesha të ngushta dhe kudo i shihje së bashku, derisa një ditë diçka ndodhi dhe dy këngëtaret u kthyen në armike. Ronela, por edhe Samanta, deklaruan se nuk ishin më mikesha. Arsyeja u tha se ishte Skivi, edhe pse gjithçka mbeti në kuadër të një thashethemi.
Lindjet
ARBANA OSMANI
Moderatorja e mirënjohur shijoi për herë të parë mëmësinë teksa përgjatë 2015-ës u bë nënë e një djali. Që nga ai moment, Arbana dhe Joni janë bërë të pandarë nga njëri-tjetri, edhe pse publiku nuk e ka njohur ende publikisht vogëlushin.
NORA ISTREFI
Askush nuk e kuptoi shtatzëninë e Norës teksa për javë me radhë kërcente në “Dance With Me”. Nora është tashmë nëna e Rennes, që është po aq mediatike sa edhe mamaja e saj.
XHEMI SHEHU
Edhe prezantuesja e “Portokallisë” do të shkëputej për një sezon nga skena, për të sjellë në jetë djalin e saj të dytë, Gabriel. Familja e saj, krahas Martinit, djalit të madh, u shtua edhe me vogëlushin tjetër, që për Xhemin është një dashuri më vete.
ARGJENTINA RAMOSAJ
Lajmi se këngëtarja ishte shtatzënë u mor vesh vetëm në muajin e gjashtë të shtatzënisë. Por që atëherë, Argjentina na ka prezantuar edhe me vogëlushin e saj, i cili është, pa dyshim, një vogëlush i adhurueshëm dhe që ngjason së tepërmi me mamanë e tij.
ILVA TARE & EDUART SELAMI
Ishte vetë moderatorja ajo që i uroi mirëseardhjen në jetë vajzës Melody. Deputeti i Partisë Demokratike dhe gazetarja e mirënjohur u bënë prindër të një vajze në fillim të korrikut. RUDINA MAGJISTARI Edhe ikona e televizioneve tona, Rudina Magjistari u bë nënë për herë të parë në 2015-ën. Mia ishte vogëlushja që i ndryshoi jetën moderatores dhe partnerit të saj, Xhavit Bajramit. Por për publikun mbetet ende një mister imazhi i Mias së vogël.
Gazeta Shqiptare/BalkanWeb