700,000 emigrantë erdhën në Evropë deri tani, 3,210 të vdekur

Mbi 700.000 emigrantë dhe refugjatë kanë mbërritur në Evropë nëpërmjet Mesdheut në vitin 2015 dhe 3,210 kanë humbur jetën apo rezultojnë të zhdukur, njoftoi sot Komisariati i Lartë i OKB-së për Refugjatët (HCR).

Këtë vit, në total, 705 200 imigrantë dhe refugjatë kanë kaluar Mesdheun. 562 355 persona kanë mbërritur në Greqi dhe 140,000 në Itali.

Sipas HCR-së, më shumë se gjysma e të mbërriturve kanë qenë sirianë. Në Greqi, sirianët përbëjnë 64 për qind të të mbërriturve.

“Numri i të mbërriturve vazhdon të jetë i lartë në Greqi, pavarësisht përkeqësimit të kushteve meteorologjike këtë fundjavë”, theksoi Organizata Ndërkombëtare për Imigracionin (OIM) në një deklaratë të dërguar për median, transmeton Indeksonline.

Për më tepër, OIM-ja nënvizoi se për shkak të kohës së keqe, është gjithmonë e më vështirë për të ndjekur anijet me imigrantë në det.

Sipas OIM-së, 5,239 persona kanë mbërritur në Greqi të shtunën dhe 4 199 të dielën.

“Që prej fillimit të muajit tetor, më shumë se 160 000 imigrantë kanë mbërritur në Greqi nga Turqia, 99 000 prej të cilëve kanë zbarkuar në Lesbos, 22 000 në Kios, 21 500 në Samos dhe rreth 7 500 në Leros”, sipas OIM-së.

Në Itali, 7,230 imigrantë kanë mbërritur në muajin tetor nga më shumë se 15 000 për të njëjtën periudhë të vitit të kaluar.