Dy sulme terroriste në lindje të Turqisë, vriten tre ushtarë

Organizata terroriste PKK herët këtë mëngjes në Bingol, në Turqinë lindore ka kryer një sulm me bombë në një tren pasagjerësh të njohur si “Trans Asya” i linjës së rregullt Ankara-Teheran, raporton Anadolu Agency (AA).

Prefekti i këtij rajoni, Yavuz Selim Kosger tha për AA se sulmi i këti mëngjesi ndaj trenit është kryer me minë të telekomanduar nga distanca duke u aktivizuar në hekurudhën mes stacionit Suveren dhe Genc. Në këtë sulm nuk kishte viktima në njerëz, por vagonat e mallrave të trenit dhe hekurudha janë dëmtuar në masë të madhe. Kosger tha se terroristët e PKK-së kanë vendosur një mjet shpërthyes të ndërtuar me dorë në binarët e hekurudhës duke e aktivizuar me telekomandë në momentin kur treni po kalonte.

Forcat turke të sigurisë kanë nisur një hetim dhe janë vënë në ndjekje të sulmuesëve, ndërsa treni vazhdoi rrugën e tij për në Iran. Paralelisht me këtë, të paktën tre pjestarë të ushtrisë turke janë vrarë në sulmin që ndodhi në Sirnak në juglindje të Turqisë.

Shtabi i Përgjithshëm i Ushtrisë turke ka thënë se terroristët kryen një sulm ndaj një patrulle ushtarake që siguronte rrugën përmes së cilës duhej të kalonte një karvan ushtarak, ndërsa nga sulmi u vranë tre ushtarë, duke përfshirë edhe një oficer.

Forcat turke të sigurisë kanë ndërmarrë masa të larta sigurie në vend dhe janë në ndjekje të sulmuesëve. Të paktën një terrorist i armatosur është vrarë në operacionet e deri tanishme.