Vetëm për 10 ditë, 6 aksidente të rënda, banorët shprehin shqetësimin e tyre
6 aksidente të rënda për vetëm 10 ditë, në rrugën Tetovë-Pirok pranë vendbanimit të Reçicës së Madhe. Aksidentet shkaktohen nga njerëz të papërgjegjshëm për shkak të vozitjes së shpejtë dhe të pakontrolluar, duke mbajtur në panik kështu edhe banorët e këtij fshati . Banorët shprehen se nuk ndihen të sigurt, dhe një gjendje e tillë, nuk iu mundëson lëvizjen e lirë të fëmijëve dhe personave të moshuar, transmeton Alsat-M.
Kryetari i Bashkësisë Lokale të fshatit ka kërkuar nga sektori i punëve të brendshme dhe nga Ndërmarrja “Rrugët e Maqedonisë” që të vendosin sa më shpejt sinjalizimet me kufizim të shpejtësisë, si dhe patrullime më të shpeshta nga policia në këtë rrugë.
Ndërkaq Sektori i Punëve të Brendshme iu përgjigj kërkesës shumë shpejt, duke nxjerrë në terren ekipe të policisë me radarë, që tani e tutje do të frekuentojnë rregullisht këtë rrugë.
Rruga nuk ka qenë asnjëherë e pajisur me sinjalizim vertikal, gjë që i legjitimon drejtuesit e automjeteve të vozisin pa kontroll. Rruga frekuentohet nga dhjetëra fshatra si të Tetovës, po ashtu edhe të Gostivarit, për një arsye më shumë, për t’iu shmangut pagesave rrugore në autostradë.
