Studentët e USHT-së realizuan vizitë kulturore në Republikën e Turqisë
Studentët dhe profesorët e Programit studimor të Sociologjisë, javën e kaluar realizuan një vizitë kulturore në Republikën e Turqisë.
Gjatë qëndrimit në Turqi, studentët e USHT-së dhe profesorët, të udhëhequr nga Doc.dr.Qani Nesimi, e vizituan Istambull Universitesi dhe Yildiz Universitesi, me ç’rast u njohën me jetën akademike dhe veprimtarinë mësimore-shkencore që zhvillojnë universitetet e lartpërmendura.
Delegacioni i USHT-së, në këto universitete u prit nga Prof.dr. Hasan Alpak dhe Prof.dr. Alparslan Açikgenç, të cilët i informuan studentët e USHT-së me jetën studentore, kërkimet shkencore dhe kapacitetet kadrovike që posedojnë universitetet e tyre.
Po ashtu, ata theksuan edhe vëmendjen e tyre që i kushtojnë bashkëpunimit me universitetet e huaja, në kuadrin e realizimit të projekteve të përbashkëta shkencore, këmbimit të stafit akademik dhe studentëve në mes universiteteve, si dhe një sërë aktivitetesh të tjera me interes akademik.
Doc. dr. Qani Nesimi, përfaqësuesit e universiteteve turke i njohu me historikun e Universitetit Shtetëror të Tetovës, rolin dhe prestigjin që ky universitet gëzon në Republikën e Maqedonisë dhe më gjerë, por edhe bashkëpunimin e frytshëm që USHT ka ngritur me disa universitete në Republikën e Turqisë.
Në kuadër të agjendës, delegacioni nga USHT-ja e vizitoi edhe Muzeun mbretëror “Dollmabaçe”, dhe u njoftua nga afër me mjediset, historikun dhe arkitekturën e tij.
Me nënshkrimin e marrëveshjeve për bashkëpunim me universitetet nga Republika e Turqisë, USHT deri sot ka realizuar disa kongrese shkencore, simpoziume ndërkombëtare dhe vizita studimore të studentëve, të cilët mbi bazën e këtyre marrëveshjeve kanë kryer praktikën profesionale dhe specializime në fusha të ndryshme.
