Kryeministri izraelit: Nëse rizgjidhem, harrojeni shtetin palestinez

Uniteti i Jeruzalemit do të ruhet në të gjitha pjesët e tij, sikurse do të vazhdojë fortifikimi i qytetit për të ndaluar çdo ndarje të mundshme në të ardhmen.

Kështu ka deklaruar kryeministri izraelit, Benjamin Netanyahu, që këtë të hënë, në prag të zgjedhjeve, ka vizituar koloninë hebraike Har Homa në afërsi të Jeruzalemit lindor.

Një ditë më parë Netanyahu dha një intervistë për portalin izraelit NRG, ku tha se, nëse do të rifitojë zgjedhjet do t’i kundërvihet lindjes së shtetit palestinez.

Ai shtoi se, Izraeli ndodhet përballë një presioni të fortë ndërkombëtar, përmes të cilit kërkohet që vendi të kthehet në kufijtë e ’67 dhe ndarja e Jeruzalemit.

Janë rreth 6 milionë izraelitët që ditën e martë do të votojnë për zgjedhjet politike, për t’i dhënë vendit një qeveri të re.

Në garë janë 25 parti, përfshirë shumë lista pakicash, por ato që mund të kalojnë pragun elektoral prej 3.25 për qind janë, sipas sondazheve të fundit, vetëm 11.

Në lojë janë 120 ulëset e Knesetit, përfaqësia e vetme parlamentare e vendit, që ka arritur në legjislaturën e 20. Rivalët kryesorë janë dy forca politik, nga njëra an,ë Likudi i djathtë, i udhëhequr nga kryeministri Netanyahu, prej 9 vitesh në pushtet; dhe nga ana tjetër, Kampi Sionist, aleanca e qendrës së majtë e përbërë nga Isaac Herzog, kryetar i laburistëve dhe Tzipi Livni, udhëheqëse e Hatnua (Lëvizja).

Lajme të ngjashme

Back to top button