A do të zyrtarizohet koalicioni në Këshillin e Komunës së Strugës?

Nuk përjashtohet mundësia që gjatë seancës së ardhshme të Këshillit të Komunës së Strugës të ketë zhvillime, të cilat do të sillnin formimin  e një koalicioni, i cili do të arrinte të përbënte shumicën në Këshill.

 Këshilli i Komunës së Strugës pritet të  mbajë mbledhjen e tij të ardhshme të hënën. Dje, siç mëson Portalb, nga burime afër kryetarit të Komunës së Strugës, Ziadin Sela mbledhje kanë mbajtur komisionet e këshillit, ndërsa të hënën do të vazhdohet me diskutimin  e pikave të  mbetura të rendit të ditës nga seanca e kaluar.

 Burimi, nuk përjashton mundësinë që gjatë seancës të ketë zhvillime, të cilat do të sillnin formimin  e një Koalicioni. Ai nuk saktëson se kush mund të jetë pjesë e këtij koalicioni, por si PDSH, ashtu edhe VMRO –DPMNE e Strugës, disa herë e kanë pohuar për Portalb, se janë duke zhvilluar bisedime intensive për arritjen e një koalicioni për të qeverisur së bashku me Komunën e Strugës.

Por, edhe përkundër këtij fakti, bisedimet midis tyre nuk kanë rezultuar me arritjen e një marrëveshjeje për koalicionim. Pjesëmarrësit në këto bisedime, ndërkaq nuk kanë bërë të ditur se për çka nuk mund të merren vesh dhe e zgjasin arritjen e marrëveshjes  për një kohë kaq të gjatë.

Shpresat për arritjen e koalicionit janë rritur sidomos pas mbledhjes së fundit të Këshillit të komunës së Strugës, kur këshilltarët në mënyrë unanime kanë votuar  sjelljen e vendimeve që kishin të bëjnë me formimin e komisioneve të këshillit , kryesisht.

Megjithatë, formimi i koalicionit nuk duket të jetë gjë e lehtë edhe përkundër votimit me unanimitet të plotë të vendimeve në mbledhjen e kaluar të Këshillit. Kjo, sepse në bllokun politik maqedonas situata është e komplikuar, kur të kihet parasysh se VMRO-DPMNE dhe  LSDM janë në koalicion. 

Këto dy subjekte hapur kanë shprehur vullnetin tyre për t’u bërë pjesë e koalicionit, por intenca e tyre është që në koalicion të hyjnë së bashku. Nga ana tjetër për PDSH-në më e pranueshme është që pjesë e koalicionit të jetë vetëm njëri nga këto dy subjekte, në kushtet kur shumica në Këshill mund të formohet edhe vetëm me njërën prej tyre.