Ministri sllovak nuk do t’i kërkojë falje Hungarisë për komentet për territoret e humbura

Ministri i Jashtëm në detyrë i Sllovakisë, Rastislav Kaçer nuk do të kërkojë falje për komentet se Hungaria mund të bëjë kërkesa territoriale për rajonin me shumicë hungareze të Sllovakisë jugore nëse Rusia arrin të pushtojë Ukrainën, transmeton Euractiv.

Komentet u bënë gjatë një emisioni televiziv të martën, i cili u pasua me shpejtësi nga thirrja e ambasadorit sllovak në Hungari në ministrinë e jashtme nga zyrtari i punëve të jashtme Tamas Menczer për “gënjeshtra të papranueshme, të pakuptimta”.

Gjatë transmetimit në kanalin televiziv Markiza, Kaçer tha, “po të kishte pasur sukses Vladimir Putin në Ukrainë, Hungaria do të kishte bërë tashmë pretendime territoriale ndaj Sllovakisë”. Ai shtoi gjithashtu se “kjo temë është tashmë e rëndësishme, prandaj është veçanërisht e rëndësishme për Sllovakinë që Putini të dështojë në Ukrainë”.

Por komentet nuk i pëlqejnë Hungarisë.

“Evropa po përballet me kriza të mëdha dhe kohë si këto kërkojnë politikanë me mendje të matur”, tha Menczer në Facebook, duke shtuar, “Ministri i Jashtëm aktual i Sllovakisë nuk është i tillë”.

Pavarësisht zemërimit në Budapest dhe thirrjeve për falje, Kaçer refuzoi të tërhiqej.

“Unë nuk do t’i kërkoj falje askujt për mbrojtjen e interesave të vendit tim. Se unë i konsideroj integritetin territorial, sovranitetin dhe lirinë e saj si gralin e shenjtë të përpjekjeve tona diplomatike”, shkroi Kaçer në një postim në Facebook.

Duke shpjeguar komentet e tij, Kaçer tha se ato nuk kishin për qëllim të kritikonin hungarezët, por politikat specifike të lidershipit aktual hungarez, të cilat ai tha se e kthyen “udhëheqësin e luftës për demokracinë në vitet ’90 në një vrimë të zezë në hartën politike evropiane dhe kalë troje për interesat e Putinit”.

Vjeshtën e kaluar, Kaçer hyri në një tjetër mosmarrëveshje me Hungarinë kur tha se ishte neveritur nga shalli që portretizonte Hungarinë e Madhe që ishte veshur nga Orbán në një lojë futbolli.