Petrovska me ambasadorët e vendeve anëtare të NATO-s: Forca më e madhe e NATO-s është uniteti dhe vendosmëria

Ministrja e Mbrojtjes, Sllavjanka Petrovska, sot ka pasur një takim pune me ambasadorët dhe atashetë e mbrojtjes të vendeve anëtare të NATO-s dhe vendeve të ftuara për anëtarësim në Aleancë, Suedia dhe Finlanda, me fokus në vendimet kryesore nga Samiti i NATO-s në Madrid.

Ministrja Petrovska theksoi se miratimi i Konceptit të ri Strategjik, forcimi i mbrojtjes dhe parandalimit të përbashkët, si dhe mbështetja e fortë politike dhe praktike për Ukrainën do të mundësojnë përshtatjen me realitetin e ri të sigurisë në kontinent në mënyrë që NATO të vazhdojë të jetë garantues i paqes dhe sigurisë së vendeve anëtare të saj dhe për të mbrojtur vlerat, lirinë dhe sigurinë e brezave të tanishëm dhe të ardhshëm.

“Angazhimi i të gjithëve është që rendi ndërkombëtar i bazuar në rregulla, demokraci, liritë individuale dhe të drejtat e njeriut duhet mbrojtur me vendosmëri. Me gjithë dallimet e tyre, aleatët kanë qenë gjithmonë në gjendje të bashkohen rreth një qëllimi themelor: të mbrojnë njëri-tjetrin dhe t’i mbajnë njerëzit të sigurt” tha Petrovska.

Petrovska theksoi se pushtimi rus i Ukrainës prishi paqen në Evropë, por bashkoi aleatët, duke shtuar se në një epokë të arkitekturës së ndryshuar të sigurisë në kontinentin evropian, vendimet historike të Suedisë dhe Finlandës për t’u bashkuar me NATO-n vetëm sa do ta forcojnë Aleancën dhe sigurinë euroatlantike.

Nga ana e aleatëve u theksua se për çdo vendim do të kenë një qasje koherente dhe plotësuese për të forcuar reciprokisht paqen dhe sigurinë ndërkombëtare. Shtetet anëtare do të përqendrohen në stabilitetin e zonës euroatlantike përmes lëvizshmërisë ushtarake, elasticitetit, ndikimit klimatik, Agjendës së Grave, Paqes dhe Sigurisë, si dhe luftën kundër kërcënimeve kibernetike dhe hibride dhe duke adresuar sfidat sistematike me të cilat përballet Aleanca.

NATO duhet të mbetet një organizatë e besueshme, e cila do të jetë e gatshme në çdo kohë të mbrojë interesat dhe vlerat e anëtarëve të saj.

“Në një epokë të konkurrencës strategjike, ndërkohë që regjimet autoritare sfidojnë parimet bazë për sigurinë tonë, Aleanca duhet të bashkëpunojë edhe më ngushtë me bashkëmendimtarët, së bashku me 32 kombe në tryezë do të jemi edhe më të fortë dhe popujt tanë edhe më të sigurt”, përfundoi Petrovska.