Shkolla shtetërore e muzikës u zgjerua edhe në Saraj
Nxënësit e Komunës së Sarajit do të kenë mundësi që arsimin fillore për muzikë prej vitit shkollor 2022/23 ta ndjekin në Saraj, pas pëlqimit të dhënë nga Ministria për Arsim dhe Shkencë dhe Komuna e Sarajit, transmeton Portalb.mk.
“Qendra Shkollore Shtetërore e Muzikës dhe Baletit “Ilija Nikollovski – Lluj” hapësirat e të cilës gjendet në qendrën e Shkupit, nga viti shkollor 2022-2023 do të ketë paralele të disperzuar për arsimin fillor për muzikë në Komunën e Sarajit”, sqaroi Ministria.
Procesi mësimor i kësaj shkolle do të zhvillohet në hapësirat e Shkollës Fillore Komunale “Dituria”.
Nisma për hapjen e zgjerimin e shkollës vjen nga prindërit dhe udhëheqësit e shkollës, ndërsa Ministria vlerësoi që kjo nuk do të ketë ndikim financiar për Buxhetin.
“Në vitin e ri shkollor 2022-2023, në Qendrën Shkollore Shtetërore të Muzikës dhe Baletit u regjistruan gjithsej 8 nxënës, por në vend që të udhëtojnë çdo ditë ndërsa me qëllim që të ulen shpenzimet dhe shqetësimet e familjeve të tyre, do të ndjekin mësimet në komunën dhe vendbanimin e tyre”, sqarojnë nga Ministria.