Petkov: Çdo propozim i BE-së për RMV-në që devijon nga qëndrimi ynë duhet të kalojë në parlament
Çdo propozim për integrim evropian të Republikës së Maqedonisë së Veriut, i cili devijon nga qëndrimi kornizë i Bullgarisë nga viti 2019, duhet të dërgohet për mendim në Komisionin për politikë të jashtme të Kuvendit popullor, transmeton Portalb.mk.
Këtë vendim, qeveria do ta votojë në seancën e sotme, tha kryeministri Kiril Petkov.
Vendimi do t’i detyrojë përfaqësuesit e Bullgarisë në Komitetin e përfaqësuesve të përhershëm dhe në Këshillin për çështje të përgjithshme që të mos miratojnë asnjë vendim për Maqedoninë e Veriut që devijon nga pozicioni kornizë i vendit pa pëlqimin e qartë të Kuvendit Kombëtar, raporton BNT.
BGNES dje njoftoi se kryeministri bullgar Kiril Petkov synon të izolojë plotësisht Ministrinë e Punëve të Jashtme (MPJ) në përpjekjet e saj për të hequr veton për fillimin e bisedimeve të anëtarësimit të Maqedonisë, duke cituar pjesë të një projekt-propozimi që vetë Petkov do ta paraqesë në seancën e parë të mundshme të qeverisë.
“Çdo vendim i Presidencës franceze të BE-së, shteti anëtar apo Komisionit Evropian në lidhje me miratimin e fillimit të negociatave të anëtarësimit në BE të PMV-së dhe Shqipërisë, i marrë në përgatitje apo mbajtjen e takimeve të Komitetit të përfaqësuesve të përhershëm (COREPER) ose Këshilli për çështjet e përgjithshme, i cili devijon nga qëndrimi Kornizë i këshillit të ministrave nga viti 2019 për t’i dërguar menjëherë Komisionit të politikës së jashtme të Asamblesë Kombëtare”, thuhet në tekstin e cituar nga BGNES.
Deputetët sot në mëngjes e pranuan kërkesën e Ka një popull si pikë e parë për të dëgjuar ministren e Punëve të Jashtme Teodora Gençovska për procesin e anëtarësimit në RMV-së dhe kjo të jetë në seancë të mbyllur, raportojnë mediat bullgare.
Kryetari i Kuvendit Nikolla Minçev urdhëroi personat nga jashtë të largohen nga salla dhe të ndalojnë transmetimin e drejtpërdrejtë, përfshirë edhe ueb-faqen e Kuvendit Popullor.
Kujtojmë se, Maqedonia e Veriut dhe Bullgaria tensionuan raportet për shkak të kontesteve historike. Sofja zyrtare kërkon që Shkupi t’i pranojë kërkesat bullgare se gjuha maqedonase është normë e asaj bullgare dhe se kombi maqedonas është krijuar nga Josip Broz Tito.
Ky kontest ka bllokuar procesin eurointegrues të vendit, me çka Bullgaria gjatë vitit 2021 i vendosi dy herë veto Maqedonisë së Veriut, njëherë në qershor, kurse më pas, më 14 dhjetor të vitit 2021, edhe një herë e bllokoi fillimin e negociatave RMV-BE.
Edhe në vitin 2020, njëjtë vendi fqinj, i vendosi dy here veto Maqedonisë së Veriut, një herë në këshillin e ministrave të Jashtëm të BE-së si dhe në Këshillin për Punë të Përgjithshme të BE-së, duke penguar në këtë mënyrë miratimin e kornizës negociuese për fillimin e negociatave të vendit me BE-në. Për zgjidhjen e kontesteve të historisë, komisioni maqedonaso – bullgar ka mbajtur takime, po nuk kanë arritur të gjejnë zgjidhje. Palët kanë mosmarrëveshje më së shumti rreth identitetit të figurave historike të Mbretit Samoil dhe Goce Delçevit.