RMV, gati 63 për qind e nxënësve konfirmojnë se dhunë në shkolla ka shpesh
Një përqindje e lartë prej 70% e nxënësve dëshmojnë sjellje të dhunshme në shkollat e tyre, por nuk e raportojnë atë për një sërë arsyesh, duke përfshirë se nuk e dinë te kush të raportojnë ose si të raportojnë, por që të mbeten anonimë. Një përqindje e lartë e nxënësve, gjegjësisht 82,3 për qind, janë përgjigjur se mësimdhënësit i kushtojnë më së shumti kohë edukimit të tillë, tregon hulumtimi i organizatës Think Tank Analitika, që u realizua me nxënës të tri shkollave të mesme të qytetit të Shkupit (SHMQSH “Zdravko Cvetkovski”, SHMQSH “Zef Lush Marku” dhe SHMQSH “Shaip Jusuf”), raporton Meta, përcjell Portalb.mk.
Hulumtimi është kryer në një mostër përfaqësuese prej 305 nxënësve, në shkollat me përbërje të përzier etnike, informuan nga Analitika, duke shtuar se qëllimi i këtij hulumtimi ishte të përcaktohen llojet e dhunës ndaj të cilave janë të ekspozuar nxënësit në shkollat e mesme, duke e shqyrtuar rolin e mësimdhënësve në parandalimin dhe veprimin në raste të sjelljeve të dhunshme në shkolla, por edhe ndaj aktorëve të tjerë të sistemit arsimor si shërbimi psikologjik-pedagogjik, institucionet kompetente dhe prindërit.
Në ngjarjen e sotme me temë: Promovimi i kulturës së paqes dhe parandalimi i dhunës në sistemin arsimor të RMV-së, drejtoresha e programit të Analitika, Bojana Mijoviq Hristovska, theksoi që pothuajse 63 për qind e nxënësve konfirmojnë se dhuna është shpesh ose vazhdimisht e pranishme në mjedisin shkollor. Shumica e tyre e njohin dhunën fizike që është më e dukshme, më tej sipas nxënësve ka edhe përqindje të lartë të dhunës psikologjike dhe kibernetike.
Aneta Trpevska, Sekretarja Shtetërore e Ministrisë së Arsimit dhe Shkencës theksoi se është jashtëzakonisht e rëndësishme të kultivohet një kulturë e paqes dhe jo dhunës në sistemin arsimor në RMV-së. Njëkohësisht, ajo vuri në dukje të gjitha reformat që Ministria po përgatit për parandalimin e dhunës dhe konfirmoi nevojën për edukim të mëtejshëm të të gjitha palëve të interesuara në këtë proces, me qëllim zbulimin e hershëm të formave të dhunës dhe parandalimin e tyre. Gjithashtu, Trpevska theksoi se Ministria e Arsimit dhe Shkencës mbetet partner në këtë proces.
Maja Hristovska nga Analitika theksoi se te 43% e nxënësve dominon përgjigjja se dhuna më së shpeshti ndërpritet nga mësimdhënësit në shkollë, gjë që tregon rëndësinë e rolit të stafit mësimdhënës në krijimin e një mjedisi të sigurt shkollor.
Në të njëjtën kohë, theksoi se përqindja e lartë prej 83.6% tregon se vajzat janë viktimat më të shpeshta të dhunës me bazë gjinore në shkolla. Dhuna në bazë gjinore si dhe barazia gjinore janë ende ndër temat më kritike në komunitetin tonë, madje edhe në shkolla. Kur flasim për shoqërinë tonë, mund të shtojmë se dhuna në bazë gjinore trajtohet si temë tabu, ka mungesë edukimi, si dhe ndihmë dhe mbështetje për vajzat e reja.
Profesorët e tre shkollave të mesme në territorin e qytetit të Shkupit (SHMQSH “Zdravko Cvetkovski”, SHMQSH “Zef Lush Marku” dhe SHMQSH “Shaip Jusuf”) në panel diskutim theksuan se shkollat janë jashtëzakonisht të rëndësishme në procesin e njohjes dhe raportimit të rasteve të dhunës, ku dhuna ndaj fëmijëve mund të zbulohet herët dhe për ta parandaluar atë. Është me rëndësi të krijohet marrëdhënie e hapur dhe e drejtë midis nxënësve, mësimdhënësve dhe prindërve pasi kjo ndihmon në uljen e dhunës në shkolla.
Sipas tyre, shërbimi profesional duhet të punojë në zhvillimin e programeve specifike për sensibilizimin e ekzistencës së dhunës, në një nivel shumë më të lartë. Ata theksuan gjithashtu nevojën për edukim të nxënësve për parandalim të dhunës, gjë që do të ndihmojë në uljen e dhunës në shkolla.
“Për këtë qëllim, është thelbësore që vazhdimisht të investohet në zhvillimin personal dhe profesional të stafit mësimdhënës dhe shërbimeve profesionale në shkolla, në mënyrë që ata të pajisen dhe të zhvillojnë aftësi dhe kompetenca më të mëdha që do të kontribuonin në krijimin e një klime më të mirë shkollore“, – rekomanduan profesorët.
