Carovska paralajmëroi që mësimi në shkolla fillore dhe të mesme do të vazhdojë me prani fizike

Ministrja për arsim dhe shkencë, Milla Carovska, pas takimit të zhvilluar me udhëheqësit e shkollave fillore dhe të mesme, vlerësoi që mësimi duhet të vazhdojë me prezencë fizike, transmeton Portalb.mk.

“Tani për tani nuk ka nevojë të ndryshohet modeli për mënyrën e zhvillimit të mësimdhënies, sepse nuk ka transmetim të brendshëm të virusit në shkolla”, deklaroi ministrja Carovska, duke marrë edhe pohimin nga drejtorët e shkollave për gatishmërinë për mësim onlajn në rast nevoje.

Ministrja raportoi që nga 0.01 deri 0.03 përqind e nxënësve janë të infektuar së fundmi nga gjithsej 240 mijë nxënës, ndërkohë 72 përqind e mësimdhënësve janë të vaksinuar.

“Prioriteti ynë kryesor i përbashkët është dhe duhet të jetë parandalimi i shkollave nga përhapja e Kovid 19, sepse është më mirë që nxënësit mësimin të ndjekin sa më gjatë me prani fizike në klasat”, deklaroi Carovska.