FIlipçe dhe Carovska tregojnë sa përqind e mësimdhënësve dhe edukatorëve janë të vaksinuar kundër Kovid-19
Ministri i shëndetësisë Venko Filipçe dhe ministrja e arsimit Milla Carovska sqarojnë që 58 përqind e të punësuarve në shkollat e Maqedonisë së Veriut janë të vaksinuar me vaksinat kundër Kovid-19, transmeton Portalb.mk.
“Gjendja në vendin tonë është stabile, nuk ka rritje drastike të numrave të pacientëve që shërohen në spitale. Vaksinimi po zhvillohet në të gjitha pikat e vendit”, deklaroi Filipçe.
Ai ka theksuar se në sektorin e arsimit janë të vaksinuar rreth 58%, ndërsa në çerdhe rreth 60%, ndërsa gjithsej në Maqedoninë e Veriut janë rivaksinuar 380 qytetarë.
“Shpresoj deri në fund të verës do të ketë përqindje më të madhe të vaksinuarve në kuadrin edukativo-arsimor, duke mundësuar që fëmijët nga shtatorit të kthehen në shkolla”, deklaroi Filipçe.
Ai paralajmëroi që në në rast të ndonjë vale të re të virusit në vjeshtë, hyrja në vendet e mbyllura mund të bëhet vetëm me dokumentin e vaksinimit.
“ Mendojmë se më e rëndësishme është, gjegjësisht skenari më i mirë është prezenca fizike ku të gjithë nxënësit sipas orareve do ta fillojnë mësimin me prezencë fizike. Deri më sot, mbi 58% e mësimdhënësve dhe bashkëpunëtorëve në shkolla janë vaksinuar”, deklaroi Carovska, duke theksuar se në rast përkeqësimi të gjendjes mund të përdoret modeli hibrid, një javë në shkollë e një javë online.
