Vuçiq, Rama dhe Zaev në deklaratën trepalëshe: Mbetemi akoma të përkushtuar në rrugën tonë drejt BE-së dhe bashkëpunimit rajonal
Në kuadër të nismës për bashkëpunim të përforcuar rajonal të Presidentit të Republikës së Serbisë, Aleksandar Vuçiq, Kryetarit të Qeverisë së Republikës së Shqipërisë, Edi Rama dhe Kryetarit të Qeverisë së Republikës së Maqedonisë së Veriut, Zoran Zaev, sot mbajtën takim pune përmes lidhjes me video konferencë, në të cilën e përcaktuan deklaratën trepalëshe, gjegjësisht deklaratën e përbashkët “Ballkan Perëndimor Evropian”, transmeton Portalb.mk.
Në deklaratën e tyre trepalëshe të Presidentit Vuçiq dhe kryeministrave Rama dhe Zaev thuhet se sot janë bashkuar për të biseduar rreth hapave të ardhshëm për bashkëpunim rajonal të përbashkët si rrugë vitale para për vendet tona, për Ballkanin Perëndimor, për Evropën dhe për rrugën evropiane si tërësi.
“Vendet tona janë pjesë e Evropës dhe gjithmonë do të jenë. Vendeve të Ballkanit Perëndimor u nevojitet BE-ja, aq sa edhe ato i nevojiten BE-së. Mossuksesi i vazhdueshëm i BE-së për të plotësuar premtimet dhe pamundësia e saj për të lëvizur para me hapjen e konferencës së parë ndërqeveritare me Shqipërinë dhe Maqedoninë e Veriut, është në kundërshtim me vullnetin evropian të vendeve tona dhe kundër interesave të vetë BE-së”, thuhet në deklaratën trepalëshe.
Konteksti në të cilin gjendemi, thuhet tutje, është sfidues dhe i njëjti është shkaktuar nga status kuo-ja shumë e gjatë e Unionit vis-a-vis procesi ynë i integrimit në BE. Megjithatë siç thuhet, mbetem edhe më të përkushtuar në rrugën drejt BE-së dhe bashkëpunimin rajonal.
“Duam më herët, se sa më vonë, të shohim se katër liritë e BE-së lëvizja e njerëzve, mallrave, shërbimeve dhe kapitalit – zbatohen në gjithë rajonin. Dhe ne do të bëjmë gjithçka që është në duart tona të lëvizim drejt këtij qëllimi përmes fuqisë së shembullit tonë. Në këtë frymë, ne do ta shfaqim mbështetjen tonë të plotë për tregun e përbashkët rajonal në Samitin e Procesit të Berlinit më 5 korrik. E dimë se vetëm me punë të përbashkët dhe nxitje të bashkëpunimit rajonal në kuadër të nismave të ndryshme rajonale – Treg rajonal i përbashkët, Shengen rajonal, Korridore të gjelbra ose në kuptim më të gjerë përmes Procesit të Berlinit – mund t’ju sjellim rezultate qytetarëve tanë. Si rajon me afër 18 milionë persona mund t’i përforcojmë ekonomitë tona, të rrisim mirëqenien e njerëzve tanë dhe të sjellim investime më të mëdha, gjë që përndryshe nuk do të ishte e mundur nëse nuk do ta bënim atë individualisht”, thuhet në deklaratën e tre liderëve të Ballkanit.
Ata njoftojnë se më 29 korrik do të takohen përsëri në Shkup për ta konfirmuar avancimin dhe për të nënshkruar marrëveshje që dalin nga zbatimi i detyrimeve nga Samiti i Berlinit, mes tre vendeve. Marrëveshje për bashkëpunim dhe ndihmë në rast të fatkeqësive natyrore, si dhe për lehtësimin e tregtisë, importin dhe eksportin mes mes tre vendeve.
“Prandaj, ne vendosëm që sot të kërkojmë nga Bashkimi Evropian dhe nga Shtetet e Bashkuara të Amerikës të bëjnë një hap bashkë me ne dhe kolegët tanë nga i gjithë rajoni. Qëllimi ynë është të zhvillojmë investime, projekte afatshkurtra për përmirësimin e mjedisit jetësorë dhe për shfrytëzimin më të madh të burimeve të ripërtëritshme të energjisë. Kjo do të ishte pjesë e zbatimit të Planit Ekonomik dhe planit të investimeve të BE-së dhe Agjendës së gjelbër për Ballkanin Perëndimor”, qëndron në deklaratë.
Këto vende, konsiderojnë ata, kanë një potencial të madh për rritje dhe zhvillim të qëndrueshëm në këtë sektor dhe se do të kërkojnë mbështetje praktike për të zbuluar cilat projekte munden, në një masë më të madhe, ta bëjnë rajonin burim të energjisë së ripërtëritshme për qytetarët dhe për të ardhmen e energjisë së gjelbër të BE-së.
Ne e njohim plotësisht dhe po e ritheksojmë rëndësinë e burimeve të rajonit tonë për tranzicionin e gjelbër në Evropë. Prandaj, ne kërkojmë që Bashkimin Evropian, me partneritet të ngushtë me Shtetet e Bashkuara të Amerikës, të jenë pjesë e zhvillimit të këtyre burimeve në mënyra që do të ndihmojnë BE-në të realizojë planet e tyre duke tërhequr më shumë investime përmes rajonit tonë, duke e bërë pjesë të tranzicionit të gjelbër evropian. Mirëqenia dhe lidhjet ekonomike të popujve tanë do të rriten atëherë kurë do të integrohemi në zinxhirët evropiane për furnizim dhe do të kontribuojmë për autonominë strategjike të BE-së. Për këtë qëllim ne jemi të përgatitur ta bëjmë pjesën tonë së bashku dhe do të bëjmë gjithçka që mundemi për t’i shndërrojmë këto përpjekje të përbashkëta në një forcë të përbashkët për të përballuar sfidat e së ardhmes si një rajon i plotë i përbërë nga gjashtë aktorë. Shqipëria është Evropë. Maqedonia e Veriut është Evropë. Serbia është Evropë. Ballkani Perëndimor është Evropë. Ne do ta përfundojmë punën e vështirë që ta bëjmë këtë pjesë të jetës së përditshme”, përfundon deklarata.
