Me violinën e 3.5 milionë dollarëve performoi në metro (video)
Në stacionin e metrosë Bell ekzekutoi për 45 minuta gjashtë kompozime të Bachut, ndërsa gjatë asaj kohe përskaj tij kaluan rreth 11 000 persona.
Vetëm pas tre minutave, një njeri i moshës mesatare e vërejti, ngadalësoi pak hapin, për disa sekonda u ndal, kurse pastaj me hap të shpejtë vazhdoi rrugën. Një minutë më vonë, violinisti i famshëm fitoi dollarin e parë nga një grua, e cila ia hodhi monedhën në kutinë afër këmbëve të tij, por duke mos u ndalur për asnjë moment.
Disa minuta më vonë, një njeri u mbështet për muri për të dëgjuar performancën e tij, por pastaj shikoi orën në dorë dhe u nis shpejt pasi me gjasë ishte vonuar në punë. Personi që i kushtoi më shumë vëmendje ishte një 3-vjeçar, të cilin nëna e tij me nguti e tërhiqte për dore, por fëmija megjithëkëtë ndal ta dëgjojë muzikën e violinës. Por, pas disa sekondave, nëna e tërhoqi më fuqishëm fëmijën për dore dhe ai u detyrua dhunshëm të largohet.
Situata e tillë u përsërit nga disa prindër që atë mëngjes çonin fëmijët dhe gjithnjë skenari ishte i njëjtë. Fëmija ndalon si i udhëhequr nga magjia, por prindi e tërheqë me zor.
Gjatë 45 minutave, sa zgjati ekzekutimi i tij në violinë, vetëm gjashtë njerëz vërtetë e dëgjuan, kurse 20 të tjerë edhe e “shpërblyen” me para të imëta, kështu që në kutinë e tij u grumbulluan 32 dollarë.
Askush nuk dha duartrokitje, askush nuk e njohu. Askush nuk e dinte që bëhet fjalë për Joshua Bellin, dhe se ai performonte në violinën e vlefshme 3.5 milionë dollarë.
Dy ditë para se të ekzekutonte në metronë e Washingtonit, Bell e kishte mbushur teatrin e Bostonit, ku çmimi mesatar i biletës ishte 100 dollarë.
Performancën e tij të fshehtë e organizoi si eksperiment gazeta “Washington post” për të eksploruar perceptimin shoqëror, shijet dhe prioritetet e njerëzve, duke u fokusuar në çështjen se a e hetojmë bukurinë rreth nesh, a dimë ta vlerësojmë dhe a dimë të njohim talentin në një kontekst të papritur