Britania miratoi vaksinën Pfizer-BioNTech, nga java e ardhshme do të hyjë në përdorim
Britania e Madhe është bërë vendi i parë perëndimor që licencoi një vaksinë kundër Kovid-19, duke hapur rrugën për imunizimin masiv me vaksinën Pfizer-BioNTech, duke filluar me grupet e rrezikut nga java e ardhshme, njofton Portalb.mk.
Vaksina është autorizuar për përdorim urgjent nga Autoriteti Rregullativ i Barnave dhe Produkteve Shëndetësore (MHRA), përpara se ta miratojë SHBA-ja dhe Evropa. MHRA iu dha fuqia për të aprovuar vaksinën nga qeveria nën rregullore të veçanta para 1 Janarit, kur ajo do të bëhet plotësisht përgjegjëse për autorizimin e ilaçeve në MB pas Brexitit, shkruan The Guardian.
Dozat e para të vaksinës do të mbërrijnë në ditët në vijim, tha kompania. Britania e Madhe ka blerë 40 milion doza të vaksinës, e cila është provuar të ketë efikasitet 95% në provat e saj përfundimtare.
“Qeveria ka pranuar sot rekomandimin nga Agjencia e Rregullatorit të Pavarur të Barnave dhe Produkteve Shëndetësore (MHRA) për të aprovuar vaksinën Pfizer-BioNTech për përdorim Kovid-19. Kjo pason disa muaj provash rigoroze klinike dhe një analize të plotë të të dhënave nga ekspertët në MHRA, të cilët kanë arritur në përfundimin se vaksina ka përmbushur standardet e saj të rrepta të sigurisë, cilësisë dhe efektivitetit”, thuhet në njoftimin e qeverisë britaneze.
Të dhënat e provës treguan se vaksina kishte efikasitet të barabartë midis vullnetarëve të rinj dhe atyre mbi 65 vjeç që janë më të rrezikuar nga Kovid. Gjinia, raca dhe përkatësia etnike gjithashtu nuk kishte bërë asnjë ndryshim.
Pfizer dhe BioNTech thonë se rrjeti i tyre i kombinuar i prodhimit ka potencialin të furnizojë globalisht deri në 50 milion doza vaksinash në vitin 2020 dhe deri në 1.3 miliardë doza në fund të vitit 2021.
